Дойду 1250 бастыҥ учуутала бириэмийэ тутуоҕа

Педагог уонна уһуйааччы сылынан учууталларга болҕомто харыс үрдээбитэ сыл саҕаланыаҕыттан билиннэ. Ол курдук, бу күннэргэ дойду тэбэр сүрэҕиттэн үөрүүлээх сонун кэллэ. Педагогическай ситиһиилэрин иһин, 2018 сылтан туттарыллар дойду бэрэсидьиэнин учууталларга бириэмийэтэ 1250 киһиэхэ диэри эбиллибит, бу иннинэ 1000 этэ.

Маннык быһаарыыны учууталлар үөрэтэр уонна иитэр үлэлэрин тупсаралларын итиэннэ кинилэр айар үлэҕэ, идэҕэ сатабылларын сайыннарар инниттэн быһаарыллыбыт.

“Күн бүгүн оскуолаҕа оҕолорго суолталаах,  ирдэнэр билиини биэрэр, киһи уонна гражданин быһыытынан сыаннастары иҥэрэр, дойдубут кэнэҕэскитин салайыахтаах дьону иитэн, үөрэтэн таһаарар айымньылаах уонна чаҕылхай  педагогтар бөлөхтөрө үлэлииллэр. Бириэмийэ ахсаана Педагог уонна уһуйааччы сылыгар эбиллибитэ суолталаах. Бу учуутал үлэтэ уонна сорудаҕа үрдүктүк сыаналарын туоһулуур”, — диэн дойду Үөрэҕириитин миниистирэ Сергей Кравцов бэлиэтээн турар.

Бириэмийэ кээмэйэ 200 тыһ. солк. тэҥнэһэр. Тустаах бириэмийэни сыллата Учуутал күнүн көрсө куонкурус түмүгүнэн туттараллар. Куонкуруска үс сылтан итэҕэһэ суох үлэлээбит, 18 чаастан кырата суох ноҕуруускалаах ханнык баҕарар учуутал кыттар кыахтаах.