«Дойду Бэрэсидьиэнин киин куоракка болҕомтото маастар-былааны толорууга эрэли саҕар»

Дойду Бэрэсидьиэнэ Владимир Путин бэс ыйын 18 күнүгэр Саха сиригэр оробуочай сырыынан үлэлээтэ.

Киин куорат баһылыга Евгений Григорьев бэлиэтээбитинэн, судаарыстыба баһылыга болҕомтотун куорат социальнай-экэнэмиичэскэй сайдыытын, дьон олоҕун хаачыстыбалаахтык тупсарыы боппуруостарыгар уурбута маастар-былааны олоххо киллэриигэ биэрбит соруктара барыта туолалларыгар эрэли саҕар.
«Ил Дархан Айсен Николаев үлэ кыбартаалыгар дойду Бэрэсидьиэнигэр Дьокуускай куорат маастар-былаанын толоруу хаамыытын иһитиннэрдэ. Бэлиэтээн эттэхпинэ, билигин уһун кэмнээх былааҥҥа киллэриллибит 90 бырайыактан уонна тэрээһинтэн 23-һэ олоххо киллэрии араас түһүмэҕэр сылдьар. Былырыын күһүн Бэрэсидьиэн маастар-былааны бигэргэппитин кэннэ аҕыйах ыйынан маастар-былаан тутуу былаһааккаларыгар уонна бырайыактыыр бюроларга тэтимнээхтик салҕаммыта», – диэтэ Евгений Григорьев.
Куорат баһылыга билигин уопсастыба саҥа эйгэтэ: Сайсары күөл кытыла уонна Р.М.Дмитриев аатынан кытыл (куорат пляһын хабан), Ленин болуоссата тутуллалларын бэлиэтээтэ. Ону сэргэ куорат киинигэр, Ленин проспегар 1 №-дээх оскуола саҥа дьиэтэ тэтимнээхтик тутуллар, киин куораттан соҕуруу уонна хотугу хайысхаларга куттала суох массыына суоллара оҥоһуллаллар.
Былаан быһыытынан, хаарбах дьиэлэртэн Спортивнай уонна Звезднай дьоҕус оройуоннарга дьону көһөрөллөр.
«Санатан эттэххэ, Бэрэсидьиэн сорудаҕынан Дьокуускай куоракка саахалланар туруктаах дьиэлэр бары 2030 сылга диэри суох буолуохтаахтар. Ол аата тыһыынчанан ыал аныгы тутуулаах олорор дьиэҕэ көһөр кыахтанар. Куорат олохтоохторо үчүгэй уларыйыылары көрөллөр, өйөбүл иһин дойду уонна өрөспүүбүлүкэ бэрэсидьиэннэригэр махтаналлар.
Куорат маастар-былаанын олоххо киллэрии сылтан сыл аайы өссө тэтимирэн иһиэҕэ. Инникитин сүҥкэн үлэ кээмэйин биһиги былаас, уопсастыба уонна биисинэс күүһү түмэн, хайаан да толоруохпут», – диэн Евгений Григорьев тоһоҕолоон бэлиэтээтэ.