«Дойду» быыстапка: Татыйаас Филиппова фотопоэзията

Бүгүн, ахсынньы 19 күнүгэр, Татыйаас Филиппова «Дойду» диэн ааттаах фотопоэзиятын персональнай быыстапка, «Үргэл» арт-галереяҕа аһылынна. Татыйаас төрөөбүт улууһун, Сахатын сирин ураты айылҕатын, дьонун-сэргэтин хаартысканан дьүһүйүүтэ быыстапкаҕа кэлбит дьон интэриэһин тарта.

Бу бэлиэ тэрээһиҥҥэ элбэх киһи, искусство диэйэтэллэрэ, киномотографтар, култуура үлэһиттэрэ, худуоһунньуктар, ааптар чугас дьоно, доҕотторо, о.д.а. кэлбиттэр. Татыйаас айар куттаах буолан, барыга дэгиттэр талааннааҕын кэпсээтилэр, чараас эйгэҕэ көрүүлэрин, суруйууларын, хаартыскаҕа түһэриилэрин сэҥээрэллэрин эттилэр.

«Үргэл» арт-галереяҕа буолбут “Дойду” быыстапката Дьокуускай культурнай олоҕор улахан түгэнинэн буолла, мустубут дьоҥҥо бөлөһүөктээһини дириҥник иҥэрэргэ уонна билиҥҥи кырдьыгы искусство нөҥүө көрөргө кыах биэрдэ. Фотограф ийэ кута уонна төрүттэригэр ытыктабыла төрүт үгэстэри уонна аныгы кэмҥэ аан дойдуну көрүүнү дьүөрэлииллэр.

Татыйаас Филиппова Чурапчы улууһун Хайахсыт сэлиэнньэтигэр төрөөбүтэ, Дьокуускайга улааппыта, Иркутскай судаарыстбыаннай  университетын бүтэрбитэ, онтон ВШЭ магистратуратыгар үөрэнэн “литературнай маастарыстыба” диэн идэни ылбыта. “Знамя” литературнай сурунаал бириэмийэтин лауреата (2020). Татыйаас үлэлэрэ урут Финляндия уонна Нидерланды галереяларыгар бииргэ оҥоһуллубут бырайыактарга көрдөрүллүбүттэрэ. Татыйаас Филиппова талааннаах суруналыыс эрэ буолбакка, бүгүн фотограф быһыытынан эмиэ арыйда.

Хаартыскалар бэйэлэрэ дириҥ духуобунай ис хоһоонноохтор, үйэлэр тухары олох бэлиэтинэн хаалыахтара. Татыйаас ыраас дууһа кистэлэҥин, кылгас кэмҥэ көстөн ааһары уонна хаһан да хаһан даҕаны хатыламмат түгэни таба тутан, үйэтитэн, хаартыскаҕа түһэрэн, дьонноругар-сэргэлэригэр үйэлэргэ, история кэрэһитэ гынан хаалларар. Кини үлэлэрэ үксүлэрэ төрөөбүт дойдутун, хаһан даҕаны хатыламмат кэрэ айылҕатын туһунан. Бэйэтэ этэринэн үлэлэрэ биир тэтимнээхтик оҥоһуллубут ойуулар хомуурунньуктара буолар. Хаартыскаҕа Дьокуускай куорат, Чурапчы улууһун Хайахсыт сэлиэнньэтэ уонна ыраах Финляндияттан кэлбит түгэннэр эмиэ хатаммыттар.

Ааптар төрөөбүт сахатын тылын бэйэтин айар үлэтин кытта дириҥник сибээстиирин чорботор. Кини сахатын тыла ырыа курдук кутуллан киирэн, иэйии буолан айарга-тутарга кыаҕы биэрбитин этэр. Быыстапка сүрүн чааһа саха норуота кут туһунан төрүт өйдөбүллэрин тойоннооһун буоларын ааптар кэпсиир. Кур-сүр туһунан анаарыыта кини бөлөһүөктүү көрүүлээҕин этэр.

Быыстапкаҕа хаартыскаҕа түһэрии техниката уонна ураты ньымалар көстөллөр. Уратыта диэн хаартыскаҕа түһэриигэ араас техникалар туттуллубуттар. Ааптар бэйэтин дьиэ кэргэнин альбомнарыттан хаартыскалары бэчээттээбитэ, туус бэчээтин уонна цианотипия ньымаларын туһаммыта, төрөөбүт сирин үүнээйилэрин өҥнөөбүтэ сэдэх көстүү. Өстүөкүлэ панелларга оҥоһуллубут инсталляциялар уратытык көстөллөр.

Татыйаас Филиппова «Дойду» диэн ааттаах фотопоэзиятын персональнай быыстапката «Үргэл» арт-галереяҕа тохсунньу 19 күнүгэр диэри туруоҕа.

Хаартыскаларга ааптар түһэриитэ