Дойду министиэристибэтэ оскуола биир кэлим  пуорматын киллэрэри былааннаабат

Бу күннэргэ оскуолаларга биир кэлим пуорма ылыллар үһү, дизайнердар “Служебнай роман” сэбиэскэй киинэ курдук көстүүмү толкуйдаабыттар   диэн сурах тарҕаммыта.

Бүгүн Арассыыйатааҕы Үөрэх министиэрстибэтэ официальнай телеграмыгар маннык суруйар:

— Үөрэх тэрилтэлэрэ “РФ үөрэх туһунан” 273 федеральнай сокуон 38-с ыст. олоҕуран, төрөппүттэр уонна үөрэнээччилэр санааларын учуоттаан таҥас тас көрүҥэр, өҥүгэр уонна быһыытыгар бэйэлэрэ ирдэбил киллэриэхтэрин сөп.

Росстандарт 2024 сыл атырдьах ыйын 31 күнүнээҕи 1155 нүөмэрдээх бирикээһинэн, таҥаһы тигээчилэргэ национальнай ыстандаарт уопсай тиэхиньиичэскэй ирдэбилин ыйбыта. Ол — үөрэх саҥа дьылыттан олоххо киирэр.

Ыстандаарка ГОСТ ирдэбилигэр сөп түбэһэр оскуола пуорматын тигиигэ аналлаах испииһэк (параметр) суруллар:

• — таҥас туһунан быһаарыы (ис өттүгэр тутуллар таҥас эмиэ)
• — уһуктаах муннуга, бүүрүгэ суох буолуохтаах;
• — оҕо типовой быһыытыгар-таһаатыгар сөп түбэһиэхтээх;
• — салгыны киллэрэр буолуохтаах;
• — сииги тэйитиэхтээх;
• — аллергияны көбүө суохтаах.

Ол эбэтэр, министиэристибэ ити иһитиннэриитинэн сирдэттэххэ, дойду оскуолаларыгар биир кэлим пуорма киирбэт. Оскуола төрөппүттэри кытта сүбүлэһэн, оҕо санаатын учуоттаан, бэйэлэрэ араас быһыылаан оскуола пуорматын толкуйдуохтарын сөп. Ол эрээри, матырыйаала ити ирдэнэр ГОСТка эппиэттиир буолуохтаах.