Дойду национальнай аһыгар болҕомтону туһаайыахха

Бу чааска «Үлэ кыбартаала» креативнай кластерга «Гастрономия — айар индустрия уонна стратегическай ресурс: Арассыыйа бородууксуйата, национальнай куукуна уонна Уһук Илин сайдыытыгар саҥа биисинэс-мадыал» диэн стратегическай сиэссийэ буола турар.

Тэрээһини Уһук Илин уонна Арктика сайдыытын корпорация инвестиционнай дэпэртээмэнин дириэктэрин солбуйааччы Мария Бадмацыренова ыыта олорор. Бу сиэссийэҕэ былаас уорганнарын, уопсастыбаннай тэрилтэлэр, дойду асчыттарын бастыҥ бэрэстэбиитэллэрэ үлэлэрин уопутун , араас сүбэни-аманы биэрэллэр. Араас эрэгийиэнтэн кэлбит санаа атастаһар дьон толкуйдара, этиилэрэ үгүс киһи болҕомтотун тарта. Сиэссийэҕэ бастакынан СӨ Аҕа баһылыгын дьыалаларын Управлениетын салайааччытын солбуйааччы Светлана Александрова санаатын эттэ.

Кини саха куукуна тын национальнай култуура биир сүрүн көрүҥүн быһыытынан көрөн, киэҥ араҥаҕа тарҕатыы наадатын ыйда:
«Биир да бүддьүөт тэрилтэтэ саха аһын бэйэлэрин кафеларыгар, остолобуойдарыгар дьоҥҥо-сэргэҕэ билиһиннэрэн тарҕаппат. Ол сүрүн төрүөтэ, баҕар, биир да бүлүүдэ эрэгийиэн да, Арассыыйа да Национальнай аһын реестригэр киирэ илигин кытта сибээстээҕэ буолуо. Ол иһин саха аһа култуура сокуонугар киирсибэт. Онон национальнай бүлүүдэни реестргэ киллэрэн, олохтоох аһы дьоҥҥо күндүлээн, төрүт култуураны харыстааһын быһыытынан ылыныахха наада. Бүгүҥҥү күҥҥэ «Тыгын Дархан» эрэстэрээн эрэ саха төрүт аһын дьоҥҥо тарҕатыыны ылсан, олоххо киллэрэн эрэрин бэлиэтиир тоҕоостоох» диэн Светлана Александрова санаатын үллэһиннэ.

Елена Потоцкая хаартыскаларга түһэриитэ