Эдэр ыаллар дьиэни куортамныырга чэпчэтиилэринэн туһаныахтара

Үп министиэристибэтэ, Тутуу министиэристибэтэ уонна «ДОМ.РФ» госкорпорация бу сыл сэтинньи 1 күнүгэр диэри эдэр ыалларга дьиэни куортамныылларыгар чэпчэтии биэрэр кыаҕы үөрэтиэхтээхтэр.

Маннык сорудаҕы дойду Бырабыыталыстыбатын баһылыга Михаил Мишустин биэрдэ.

«Үп министиэристибэтэ уонна Тутуу министиэристибэтэ „ДОМ.РФ“-ны кытта бииргэ эдэр ыалларга чэпчэтиилээх усулуобуйанан куортамҥа дьиэни биэрии көрүҥүн кэҥэтэр усулуобуйаны олохтуур туһунан Федерация Сэбиэтин этиилэрин үлэлээн таһаарыахтаахтар», — диэн бырабыыталыстыба саайтыгар суруллубут.

Ону таһынан, биэдэмистибэлэр ипотекаҕа кирэдьииттэри биэрии бэрээдэгин тупсарыыга көҕүлээһиннэри киллэриэхтээхтэр. Үлэ түмүгэ бырабыыталыстыбаҕа  сэтинньи 1 күнүгэр диэри билиһиннэриллиэхтээх.

Санаттахха, урут СМИ-лэр иһитиннэрбиттэринэн, «Сиэрдээх Арассыыйа — Кырдьык иһин» фракция дьокутааттара Госдуумаҕа киллэрэр былааннаах сокуоннарын барылыгар олоҕуран, дьиэ-уот усулуобуйаларын тупсарыыга наадыйар оҕолоох эдэр ыаллар дьиэ куортамыгар ый аайы төлөбүр  ылар кыахтаныахтара.