Багдарыын Ньургун үлэтигэр Чэриктэй сирин аата киириэ

Уус Алдаҥҥа Чэриктэй нэһилиэгэр филологическай наука кандидата Багдарыын Ньургун кэлэн үлэлээн барда.

Сири-уоту үчүгэйдик билэр В.Е. Гороховтыын, А.С. Рожинниин, нэһилиэк дьаһалтатын кытта атах тэпсэн олорон кэпсэттилэр. Олорор түөлбэбит сирдэрин, күөллэрин, үрэхтэрин, арыылар ааттарын сурунна. Олохтоох бибилэтиэкэҕэ сылдьан нэһилиэк туһунан кинигэлэри, ыйынньыктары көрдө, үөрэттэ.

Ааҕааччыларга аҕатын Багдарыын Сүлбэ кинигэлэрин бэлэх уунна. Ол кэнниттэн Сэһэн Ардьакыап аатынан улуустааҕы түмэл научнай үлэһитин А.П. Сивцевы уонна кыраайы үөрэтээччи М.Е. Иванованы кытта Чэриктэй ытык бэлиэ сирдэригэр: Кырдьаҕас Өтөххө 19 үйэҕэ Бороҕон кулубата Кылыкынай кыыһа сүктэн баран иһэн сынньанарыгар туруортарбыт туос Моҕол ураһата турбут миэстэтигэр ордон хаалбыт үс сэргэни (баҕананы), Малтахааҥҥа 1879-1885 сылларга Дүпсүн улууһугар кулубанан талыллан үлэлээбит Василий Петрович 1865 сыллаахха туттубут дьиэтин сэргээн көрдө-иһиттэ.

Топономиканы үөрэтэр Багдарыын Ньургун үлэтигэр Чэриктэй сирин аата киириэ диэн эрэнэбит.

Анастасия Лукачевская

Ааптар хаартыскалары тиксэриитэ