Дойду сүрүн докумуонун бырайыага иккис ааҕыыга ылылынна

Госдуума пленарнай мунньаҕар 2026-2028 сыллардааҕы федеральнай бүддьүөт бырайыагын иккис ааҕыыга ылынна.

«Гражданнар иннилэригэр баар бары социальнай эбэһээтилистибэлэр толоруллуохтара диэн эрэллээхтик этиэхпитин сөп. Ону таһынан, биһиги үрдүк эбэһээтилистибэлэри ылынабыт. Уонна, биллэн турар,  байыаннай дьайыы кыттыылаахтара туохха да наадыйыахтара суоҕа — биһиги ол туһугар барытын оҥорорго кыһаллыбыт», — диэн Госдуума бэрэссэдээтэлэ Вячеслав Володин бэлиэтээтэ.

Кини этэринэн, бүддьүөт «ыҥырыылар уустук усулуобуйаларыгар» ылыллар. «Биһиги дойдубутугар 30 тыһыынчаттан тахса сааҥсыйа биллэрилиннэ. Эһиги көрөҕүт, Евросойуус өттүттэн биһиги активтарбытыгар туһаайан хайдах курдук эйэтэ суох дьайыылар оҥоһуллалларын», — диэн бэрэссэдээтэл бэлиэтээтэ. Бүддьүөт бырайыагар хас да суолталаах көннөрүү киирдэ, чуолаан, байыаннай дьайыы кыттыылаахтарыгар уонна кинилэр дьиэ кэргэттэригэр көмөлөһөр «Аҕа дойдуну көмүскээччилэр» пуонданы үбүлээһини улаатыннарыы туһунан. Пуонданы үбүлээһин 50 млрд солкуобайтан тахса буолуоҕа.

Эбии бүддьүөттэн өйөбүлү буойуннар дьиэ кэргэттэрин кытта үлэлиир атын кэммиэрчэскэйэ суох тэрилтэлэр, ону тэҥэ хамсааһыннара уонна инбэлииттэр уопсастыбаннай тэрилтэлэрэ ылыахтара. Байыаннай дьайыы кыттыылаахтарын протезтааһыҥҥа уонна комплекснай реабилитациялааһыҥҥа бүддьүөт ороскуота улаатыаҕа, онон эрэгийиэннэргэ итинник көмө оҥоһуллуутун үрдэтиэҕэ. Кэлэр сылга 10-тан итэҕэһэ суох үрдүкү технологиялаах протезтыыр кииннэри тэрийэр былааннанар.

2026 сылга эбии үп-харчы манныкка туһаайыллыаҕа: оскуолалары хапытаалынай өрөмүөннээһиҥҥэ (2,2 млрд солкуобай), социальнай истипиэндьийэлэргэ (3 млрд солкуобай), байыаннай үөрэх кииннэрин үбүлээһиҥҥэ (1,7 млрд солкуобай), чэпчэтиилээх эминэн-томунан хааччыйыыга (10 млрд солкуобай), эрэгийиэннээҕи уонна олохтоох суоллары тутууга уонна өрөмүөннээһиҥҥэ (65 млрд солкуобай), тыа сирин биир кэлимник сайыннарыыга (13,4 млрд солкуобай), кыра агробиисинэһи өйөөһүҥҥэ (7,8 млрд солкуобай), уопсастыбаннай тырааныспары саҥардыыга (12,8 млрд солкуобай). Маны таһынан эбии үбү-харчыны тыа хаһаайыстыбатын тиэхиньикэтинэн хааччыллыыны үрдэтиигэ, социальнай гаастааһыҥҥа туһаайар былааннаахтар.