Хаартыска: К. Новгородова.
Алтынньы 17-31 күннэригэр Дьокуускай куоракка ыытылла турар “Чайковский Фест. Якутск” бэстибээл төрдүс биэчэрэ “Евгений Онегин” операҕа ананна.
Петр Чайковскай уонна К.С.Шиловскай либреттоталарын Саха Өрөспүүбүлүкэтин ускуустубатын үтүөлээх диэйэтэлэ Карл Сергучев режиссердаан туруорда.
Үс оонньуулаах опера премьерата Суорун Омоллоон аатынан Опера уонна балет тыйаатырыгар 2024 сыл кулун тутар 2 күнүгэр Александр Пушкин төрөөбүтэ 225 сылыгар ананан көрдөрүллүбүтэ.
Быйылгы бэстибээл бырагырааматыгар киирбит «Евгений Онегин» уратытынан манна сүрүн оруолларга ыҥырыылаах ыалдьыттар, дойду сүрүн тыйаатырдарын артыыстара оонньообуттара буолла. Тэрийээччилэр этэллэринэн, билиэт эрдэттэн бүппүтэ дьон бэстибээли, сонун туруоруулары күүтэллэрин туоһулуур.
Евгений Онегины биһиги биир дойдулаахпыт, Мариинскай тыйаатыр солиһа, Саха Өрөспүүбүлүкэтин уонна Санкт-Петербург куорат үтүөлээх артыыһа Григорий Чернецов, Ленскэйи Улахан тыйаатыртан ыҥырыллан кэлбит солист, Хотугу Осетия-Алания Өрөспүүбүлүкэтин үтүөлээх артыыһа, норуоттар икки ардыларынааҕы куонкурустар, Лучано Паваротти кэриэһигэр тенордар аан дойдутааҕы куонкурустарын, “Онегин” опера бириэмийэтин, “Кыһыл көмүс мааска» тыйаатыр национальнай бириэмийэтин лауреата Алексей Татаринцев толордулар. Манна сыһыаран эттэххэ, бу икки артыыс биир сыанаҕа оонньообуттара диэн суоҕа, онон биһиги Операбыт тыйаатырын сыанатыгар аан бастаан иккиэн сүрүн оруолларга бэйэлэрин көрдөрдүлэр. Көрөөччү ытыһын тыаһын харыстаабата, кинилэр талааннарын, толорор маастарыстыбаларын үрдүктүк сыаналаата.
Татьяна уобараһын СӨ култууратын туйгуна Зинаида Колодезникова, онтон Ольга уобараһын СӨ үтүөлээх артыыската Екатерина Корякина арыйдылар.
Суорун Омоллоон аатынан Опера уонна балет тыйаатырын хорун уонна балетын артыыстара, оркестр (дирижер СӨ ускуустубатын үтүөлээх диэйэтэлэ Павел Васьковскай) нуучча оператын чөмчүүгэр – “Евгений Онегиҥҥа” сүрүн көстүү, төһүү күүс буолбуттара саарбаҕа суох. Толорооччулар таҥастара-саптара оччотооҕу кэм тыынын итэҕэтиилээхтик биэрэллэр.
Бэлиэтээн эттэххэ, “Евгений Онегины” дойду академическай, мусукаалынай тыйаатырдарын сыанатыгар туруоралларыгар дьоруойдары арыйыыга туруорааччылар, артыыстар уонна көрөөччүлэр ортолоругар мөккүөр, утарыта санаа куруук баар. Ол аата улуу Пушкин хоһоонунан арамаана билигин да ааҕааччыны, көрөөччүнү умсугутар.
Петр Чайковскайга “Евгений Онегин” ис хоһооно аан бастаан олуона курдук көстүбүт. Ол гынан баран, төһөнөн ити санаа киниттэн арахсыбатаҕай да, композитор уоскулаҥы билбэтэх. Букинистическай маҕаһыыннарга “Евгений Онегин” туомун бэрт эрэйинэн булбут уонна түүнү быһа ылларан аахпыт. Онтон сарсыарданан сценарий бэлэм буолбут.
Ааспыт нэдиэлэҕэ Өлүөхүмэ улууһун Заречнай нэһилиэгэр оҕо аймах, дьон-сэргэ кэтэспит кэрэ-бэлиэ күнэ буолла. Ол курдук …
Ыраастаммыт, сууйуллубут куобаҕы өлүүлэргэ араартыыбыт, сибиинньэ эбэтэр сылгы этин кытта булкуйабыт. Эттэри чугуун иһиккэ кутабыт.…
Бырабыыталыстыба бэрэссэдээтэлин солбуйааччы Георгий Степанов Дьокуускайга В.П. Решетников аатынан кырдьаҕастар, инбэлииттэр олорор интэринээт-дьиэлэригэр уонна анал…
Дьокуускай куорат Борокуратуурата Арассыыйа ИДьМ “Дьокуускайдааҕы” СУ МУ РФ ХК 159 ыст. 4 ч. көбүппүт…
Кэнники кэмҥэ оҕолор түмсэн оонньообот буоллулар, үксүгэр төлөпүөнүнэн эрэ оонньууллар. Оттон элбэх буолан, сүүрэн-көтөн оонньооһун…
Бүгүҥҥүттэн М.К.Аммосов аатынан Хотугулуу-Илиҥҥи федеральнай университет Арассыыйа Хотугулуу-Илиҥҥи норуоттарын тылларын уонна култуураларын үнүстүүтүгэр “Саха тыла…