Дойду таһымыгар кыайыылаах түөлбэлэр ааттаннылар

Бу күннэргэ дойду иһинэн үлэлиир территориалнай тэриллиилэр (түөлбэлэр) ОАТОС бырабылыанньаларын киэҥ ыҥырыылаах мунньаҕар 2023 сылга Арассыыйатааҕы V “Бастыҥ үлэлээх ТОС” куонкурус түмүгүн таһаарда.

Онно Саха сириттэн үс түөлбэ биэс иһигэр кыайыылааҕынан ааттанна. 1-кы миэстэҕэ “Айтал” ТОС (Горнай улууһун “Одуну нэһилиэгэ” МТ) таҕыста. Бу түөлбэ чөл олох иһин үлэҕэ уонна физкултуураны, успуорду сайыннарыыга бастаата. “Теплица” ТОС (Таатта улууһун “Орто Амма” МТ) “Тупсарыы уонна экология” түһүмэххэ 4-с миэстэни ылла.  “ТОС бастыҥ салайааччыта” номинацияҕа Горнай улууһун Бэрдьигэстээҕиттэн «Сардаҥа» түөлбэ салайааччыта Любовь Мордовская 5-с миэстэҕэ таҕыста.

Кыайыылаахтары төрөөбүт дойдуларын дорҕоонноохтук ааттаппыттарынан истиҥник эҕэрдэлиибит!