Дойду тэбэр сүрэҕэр ситиһиилэннилэр

Москваҕа «ФОЛК-ЗВЕЗДА» норуоттар икки ардыларынааҕы бэстибээлгэ Сунтаар улууһун Дьаархан нэһилиэгиттэн «Соргу дугуй» олоҥхоһуттар бөлөхтөрө ситиһиилээхтик кытынна.

Уопсайа 25 араас фольклор кэлэктиибэ кыттыбытыттан биир дойдулаахтарбыт сэттэ иһигэр киирэннэр, финалга таҕыстылар. «Чулууттан чулуу», «Бастыҥ национальнай көстүүм», «Норуот бастыҥ уус-уран айымньытын өрө тутуу», о.д.а. анал ааттары ылан 20 тыһ. солк. харчынан наҕараадаланнылар. Салайааччылар:  Лариса Иванова — Ырыа Дьаархан, Анна Николаева, Дмитрий Кондратьев Москва куоракка РФ Бэрэсидьиэнигэр СӨ бастайааннай бэрэстэбиитэлистэлэ А.С.Федотовтан махтал суруктары туттулар. Сахалыы төрүт таҥастарын хайҕаатылар, сэҥээриини ыллылар, Саха сирин, Сунтаар улууһун дорҕоонноохтук ааттаттылар.

Түгэнинэн туһанан салайааччылар көмөлөспүт, өйөөбүт дьонноругар, төрөппүттэргэ махтал тылларын аныыллар. Оҕолорбут үүнэ-сайда туралларыгар төһүү күүс буоллугут диэн бэлиэтииллэр. Манна даҕатан эттэххэ, салайааччылара Лариса Николаевна оһуохайга өр сыллаах айар үлэтэ сыаналанан, СӨ Ил Дарханын  стипендиатынан буолбута. Кини оһуохайга өр сылларга хоннохтоохтук этэр, кылыһахтаах куоластаах Дархан этээччибит буолар. Бэйэтин дьоҕурун сайыннарарын сэргэ, элбэх оҕону, ыччаты үөрэтэр-такайар.

Марта Николаева.

Хаартыскалар Л.Иванова тиксэриилэрэ