Дойду Үөрэҕириитин министиэристибэтэ оҕолор сынньалаҥнарын туһунан иһитиннэрдэ

РФ Үөрэҕириитин министиэристибэтэ чиэппэринэн үөрэтэр оскуолаларга биэдэмэстибэ ыйбыт сынньалаҥ кыраапыгын тутуһалларыгар сүбэлээтэ. Иһитиннэриини министиэристибэ официальнай телеграм-ханаалыгар таһаарбыттар.

Чиэппэринэн үөрэтэр систиэмэлээх оскуолаларга сынньалаҥы бу курдук биллэрэргэ сүбэлииллэр:

• — 2025 сыл алтынньы 25 күнүттэн сэтинньи 2 күнүгэр диэри (сэтинньи 3 уонна 4 күнүнээҕи бырааһынньыктарын учуоттаан);
• — 2025 сыл ахсынньы 31 күнүттэн 2026 сыл тохсунньу 11 күнүгэр диэри;
• — 2026 сыл кулун тутар 28 күнүттэн муус устар 5 күнүгэр диэри;
• — 2026 сыл ыам ыйын 27 күнүттэн атырдьах ыйын 31 күнүгэр диэри.

Итини тэҥэ, биэдэмэстибэ салайааччыта саҥа үөрэх дьыла балаҕан ыйын 1 күнүттэн 2026 сыл ыам ыйын 26 күнүгэр диэри салҕанарын санатар. Сынньалаҥ сэттэ күнтэн итэҕэс буолуо суохтаах.