Дойду үрдүнэн “Көр, бу Арассыыйа!” куонкуруска видеороликтары тутуу саҕаланна

Саха сирэ көҕүлээһининэн “Көр, бу Арассыыйа!” видео-аккырыыккалары атастаһыыга Бүтүн Арассыыйатааҕы куонкурус V үбүлүөйдээх сезона бүгүн, алтынньы  21 күнүгэр, саҕаланна  Ил Дархан, Бырабыыталыстыба пресс-сулууспата диэн иһитиннэрэр.

Сезон Улуу Кыайыы 80 сылыгар ананар. Кыттааччылар 3 мүнүүтэттэн уһуна суох видеоролигы устан, RUTUBE видеопорталыгар угуохтаахтар.

Манна оҕолор бэйэлэрин хос эбээлэрэ, хос эһээлэрэ, аттыгар баар дьонноро Кыайыыга укпут кылааттарын туһунан кэпсииллэрэ киириэхтээх: ханна сэриилэспиттэрэ, ханнык кыргыһыыларга кыттыбыттара, ханнык мэтээлинэн наҕараадаламмыттара, оҥорбут дьоруойдуу быһыылара, ону тэҥэ сэрии кэмигэр олорбут дьоннорун үйэтитэр дьиэ кэргэн устуоруйатын хайдах харайа, уура сылдьаллара.

Куонкуруска кыттааччылар порталга алтынньы 16 күнүттэн сэтинньи 24 күнүгэр диэри регистрацияланаллар. Видеороликтары тутуу алтынньы 21 күнүттэн саҕаланар. Кыттааччылар хаачыстыбалаах үлэни оҥороллорун туһугар кинилэри кытта режиссердар, продюсердар, блогердар маастар-кылаастары ыытыахтара.

Кыайыылаахтар аһаҕас куоластааһын түмүгүнэн ахсынньыга быһаарыллыахтара, сыаналаах бириистэринэн наҕараадаланыахтара.