Дьокуускайга дойду үрдүнэн саамай улахан Адаптивнай үөрэх комплекса аһылынна

Дьокуускайга Арассыыйаҕа саамай улахан доруобуйаларынан хааччахтаах оҕолорго аналлаах Адаптивнай үөрэх комплексын үөрүүлээх аһыллыыта буолла.

Тэрээһиҥҥэ СӨ Ил Дархана Айсен Николаев кыттыыны ылла. Бу туһунан sakha.gov.ru иһитиннэрэр.

Тутуу бастакы түһүмэҕинэн 550 миэстэлээх оскуола аһыллыыта буолла. Бу сыл бүтүөр диэри 200 миэстэлээх оҕо уһуйаанын уонна 150 миэстэлээх интэринээт тутуутун түмүктүүр былааннанар. «Бүгүн эһигини бу бэлиэ түгэнинэн — адаптивнай үөрэх комплексын дьиэтэ арыллыбытынан ис сүрэхпиттэн эҕэрдэлиибин. Бу күнү биһиги олус өр күүппүппүт. Урут Дьокуускай куорат баһылыга эрдэхпинэ, 34-с оскуоланы урукку 18-с оскуола дьиэтигэр көһөрөр, оттон 18-с оскуолаҕа бэйэтигэр саҥа дьиэни тутар туһунан быһаарыы ылыммыппыт. Оччолорго биһиги инники туһунан толкуйдаан саҕалаабыппыт: салгыы тугу уонна ханна тутуохха сөбүй диэн. Кэлин, өрөспүүбүлүкэ баһылыга буолан баран, бу тиэмэҕэ эмиэ төннүбүтүм. 2021 сыллаахха педагогтары, төрөппүттэри уонна оҕолору кытта араас барыйааннары ырыппыппыт уонна маннык түмүккэ кэлбиппит: судургутук оскуоланы эбэтэр интэринээти эрэ буолбакка, доруобуйаларынан ураты кыахтаах оҕолорго улахан үөрэх кластерын тэрийиэххэ наада. Саамай үрдүк аныгы ирдэбиллэргэ эппиэттиир кластеры», — диэн СӨ Ил Дархана Айсен Николаев бэлиэтээтэ.

Кини бырайыак федеральнай таһымҥа биһирэммитин эттэ: «Бүгүҥҥү күҥҥэ Арассыыйаҕа маннык эбийиэктэр суохтар — бу ураты уопут уонна биһиги  киэн туттар толору бырааптаахпыт». Саҥа үөрэх комплекса инклюзивнай үөрэхтээһин аныгы ыстандаартарыгар толору эппиэттиир. Эбийиэк доруобуйаларынан хааччахтаах оҕолор наадыйыылара учуоттанан тэриллибит, табыгастаах уонна хааччаҕа суох эйгэни хааччыйар.