Дойдуга 25-гэр диэри төрөөбүт дьахталларга анал босуобуйа аныыры үөрэтэллэр

Госдуума дьокутааттара дойдуга демографияны үрдэтиигэ, чуолаан Арассыыйаҕа төрүүр дьахталларга эбии өйөбүл дьаһалын олохтуурга этии киллэрдилэр.

Киирбит этии үөрэтиллэн ылылыннаҕына, дойдуга 25 сааһыгар диэри ийэ буолбут дьахталларга 200 тыһ. солк. диэри биир кэмнээх босуобуйа аныахтарын сөп. Бу туһунан ТАСС иһитиннэрдэ.

Докумуоҥҥа сурулларынан, биир кэмнээх төлөбүр кээмэйин  матырыйаалынай балаһыанньатыттан тутулуга суох эдэр ийэлэр бары ылыахтара диэн этиллэр.

Сокуон ааптардара Арассыыйа үрдүнэн оҕо төрөөһүнүн ахсаана аҕыйаабытын санаттылар. Итининэн сибээстээн, демографическай балаһыанньаны тупсарар сыаллаах, анал дьаһал ылыллыаҕа. Сүрүн төрүтүөнэн эдэр кыргыттар ийэ буоларга тиэтэйбэттэрин, үп-харчы өттүнэн тутулуга суох буолуутугар дьулуһары ордороллорун бэлиэтииллэр.

Санаттаахха, бу иннинэ Госдуумаҕа дойду бырабыыталыстыбата элбэх оҕолоох ыалларга ипотека көмөтүнэн олорор дьиэни атыылаһарга болдьоҕун 7 сылга диэри эбии уһатар сокуон барылын киллэрбитэ.