Дойдуга сэдэх уонна экзотическай кыыллары дьиэҕэ иитэр бобулунна

Кобралар, ооҕуйдар, эбисийээнэлэр, пеликаннар… Балаҕан ыйын 1 күнүттэн дойду үрдүнэн чааһынай дьиэҕэ уонна кыбартыыраҕа экзотическай, сэдэх харамайдары, кыыллары иитэр-тутар бобулларын туһунан саҥа сокуон күүһүгэр киирдэ. Бу испииһэккэ уопсайа 121 харамай баар.

Саҥа ирдэбил бөдөҥ сиэмэх кыылларга, дьааттаах сыыллааччыларга, ооҕуйдарга, көтөрдөргө уонна уу харамайдарыгар сыһыаннаах. Сокуон бу сыл балаҕан ыйын 1 күнүттэн күүһүгэр киирдэ уонна 2031 сылга диэри үлэлиэҕэ. Бобуллубут кыыллары ииппиттэр харамайдарын зоопарка, реабилитационнай киин курдук анал тэрилтэлэргэ туттарыахтаахтар.

Дьиэҕэ иитэргэ бобуллубут харамайдар:

• Сыыллааччылар: королевскай кобра, мамба, тайпан, 4 миэтэрэттэн уһуннаах бөдөҥ питон уонна удав, комодскай варан, крокодил, черепаха;
• Сэдэх кыыллар: хахай, баабыр, леопард, гепард, эһэ, бөрө, гиена, слон, бегемот, носорог, приматтар (шимпанзе, горилла, орангутан уо.д.а.);
• Ооҕуйдар: каракурт, «черная вдова», Бразилия ооҕуйдара, тарантул бары көрүҥнэрэ;
• Көтөрдөр: страус, пеликан, фламинго, туруйа, мэкчиргэ;
• Уу харамайдара: электрическэй скат, акула, мурена, угри.

Сокуону кэстэххэ туох эппиэтинэс көрүллэрий?

РФ Административнай кодексатын 8.52 ыстатыйатынан административнай ыстараап көрүллэр: физическэй сирэйдэргэ – 15 тыһыынча солкуобайга диэри, Кыһыл кинигэҕэ киирбит кыыллар буоллахтарына, РФ Холуобунай кодексатын 258.1 ыстатыйатынан холуобунай эппиэтинэс көрүллэр: 1 мөлүйүөн солкуобайга диэри ыстараап эбэтэр 4 сылга диэри көҥүлү быһыы.

Дьиэҕэ иитэргэ бобуллубут кыыллары суутунан былдьаан, зоопаркаларга, реабилитационнай кииннэргэ эбэтэр атын официальнай тэрилтэлэргэ туттарыахтарын сөп.