Дойдуҥ кэрэ айылҕатын туһунан кэпсээ

Быйыл ыам ыйын 1 күнүттэн ахсынньы 30 күнүгэр диэри «Дальний Восток – Земля приключений» Бүтүн Арассыыйатааҕы куонкурус иккис сезонугар сайаапкалары ылыы саҕаланна.

«Бүтүн Арассыыйатааҕы куонкурус – бу эһиги олорор сиргит кэрэ айылҕатын, айар дьоҕургутун көрдөрөргүтүгэр кыаҕы биэрэр.  Куонкуруска ким баҕалаах, ханна үлэлиириттэн, үөрэнэриттэн тутулуга суох кыттыан сөп. Сатыы хаамыыларга, кыһыҥҥы айылҕаҕа дуоһуйа сынньалаҥҥа, бэлэсипиэтинэн айаҥҥа, уунан устуу туһунан төһө баҕарар видеоҕа устан кэпсиэххитин сөп. Саха сирин кэрэтин, хатыламмат айылҕатын туһунан аан дойду билэрин курдук, айымньылаах үлэҕитинэн кыттыҥ!», – диэн урбаан, атыы-эргиэн уонна туризм миниистирэ Тимур Ханды ыҥырар.

Куонкуруска кыттарга анаан Уһук Илин ханнык баҕарар муннугар сылдьан, айаннаан устубут кылгас кээмэйдээх киинэҕитин ыытаҕыт. Ону дьүүлүүр сүбэ сыаналыа. Үчүгэйэ диэн, куонкуруска уопутаах айанньыттары таһынан,  айылҕаҕа сынньанарын сөбүлүүр дьон кыттыахтарын сөп. Онуоха анал устар камераҕа эрэ буолбакка, төлөпүөнүнэн устуу эмиэ барыан сөп диэн тэрийээччилэр бэлиэтээн этэллэр.
Куонкурус маннык номинацияларынан сыаналанар: Гран-при (бастыҥ айан); сатыы хаамыы (айылҕаҕа сатыы хааман походтааһын, бэлэсипиэтинэн айан); уунан айан (өрүһүнэн, муоранан устуу, уу аннынан айан, серфинг); кыһыҥҥы айан (хайыһарынан айан, ыт көлөлөөх айан, бэлэсипиэтинэн кыһыҥҥы айан, сноубординг).

Ураты болҕомто Уһук Илин биллэ илик сирдэринэн, аан бастакы арыйааччылар айаннарын маршруттарыгар ууруллуоҕа.

Санатан эттэххэ, куонкурус РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ – РФ Бырабыыталыстыбатын бэрэссэдээтэлин солбуйааччы Юрий Трутнев көҕүлээһининэн, РФ Уһук Илини сайыннарыы министиэристибэтин, «Уһук Илин уонна Арктика сайдыытын корпорацията» АУо уонна Социальнай көҕүлээһиннэр сайдыыларын пуондатын көмөтүнэн ыытыллар.

Куонкурус туһунан сиһилии бу сигэнэн киирэн билис: https://путешественникдв.рф/