Докучаевскайга Саха сирин миэдиктэригэр саба түстүлэр диэн сымыйа сурах тарҕанна

Бу күннэргэ социальнай ситимнэргэ ДНР-га Докучаевскай куоракка үлэлии тиийбит Саха сирин миэдиктэригэр итирик туруктаах дьон саба түспүттэрин, өссө төлөпүөннэрин, харчыларын былдьаабыттарын туһунан сурах тарҕанна.

СИА-ҕа Доруобуйа харыстабылын министиэристибэтэ иһитиннэрбитинэн, туһааннаах сурах сымыйа, оруна суох.  «Туох да буолбатаҕа. Саха сирин миэдиктэрин биригээдэтиттэн мин билигин соҕотоҕун Докучаевскайга баарбын», — диэн СИА-ҕа Өрөспүүбүлүкэтээҕи 2 нүөмэрдээх балыыһа хирург-бырааһа Иван Эверстов кэпсээбит.

Маны таһынан сымыйа сурах тарҕанна диэн Өрөспүүбүлүкэтээҕи офтальмологическай балыыһа кылаабынай бырааһа  Иван Луцкан эттэ. «Ити кэмҥэ мин ДНР үлэлээбитим. Доруобуйа харыстабылын эбийиэктэригэр сылдьыбытым, Гусак аатынан суһал уонна  чөлүгэр түһэрии хирургия институтун   лабораториятын аһыллыытыгар кыттыбытым, ДНР Доруобуйа харыстабылын министиэристибэтин салалтатын, парламент кэмитиэтин кытта көрсүбүтүм»,— диэн  Луцкан кэпсээбитин СИА суруйар.