Хаартыска: kremlin.ru
Докучаевскайга үөрүүлээх тэрээһин буолла.
Бэҕэһээ, муус устар 15 күнүгэр, РФ Бэрэсидьиэнэ Владимир Путин «О развитии инфраструктуры для жизни» Судаарыстыбаннай Сэбиэт Президиумун мунньаҕын кэмигэр видеонан сибээскэ ДНӨ баһылыга Денис Пушилин успуорт комплексын арыйыы туһунан дакылаатын иһиттэ. Кини Докучаевскайга «Юность» сөтүөлүүр сирдээх (бассейн) успуорт комплекса үлэҕэ киирбитин туһунан эттэ. Бу Саха сирэ ыкса сибээһи олохтообут ДНӨ куоратыгар чөлүгэр түһэрбит эбийиэктэриттэн биирдэстэрэ.
Денис Пушилин Арассыыйа Бэрэсидьиэнигэр соторутааҕыга диэри улаханнык алдьанан-кээһэнэн турбут эбийиэк саҥардыллыбытын, бу куорат дьонугар-сэргэтигэр суолтатын бэлиэтээтэ. Кини Саха сирин олохтоохторугар уонна Ил Дархан Айсен Николаевка болҕомтолорун иһин уонна Докучаевскайга, Кировскайга социальнай инфраструктураны чөлүгэр түһэриигэ көмөлөрүн иһин махтанна. ДНӨ салайааччыта успуорт комплексыгар куорат уонна чугастааҕы нэһилиэнньэлээх пууннар олохтоохторо сөбүлээн кэлэллэригэр, ону таһынан манна үрдүк таһымнаах спортивнай тэрээһиннэр ыытыллалларыгар эрэнэрин биллэрдэ.
Бэрэсидьиэн, бастатан туран, эбийиэккэ болҕомтотун уурда, успуорт саҥа комплексыгар харыстабыллаахтык сыһыаннаһыы наадатын эттэ.
1976 сыллаахха тутуллубут дьиэ эргэрбитэ, материальнай-тэхиньиичэскэй баазата саҥардыллыбатаҕа бэлиэтэнэр. Онтон билигин, өрөмүөн кэнниттэн манна 28 тыһыынча киһи сынньанар, доруобуйатын чэбдигирдинэр кыахтанна. Успуорт комплексыгар футбол, баскетбол, чэпчэки атлетика, тустуу сиэксийэлэрэ ыытыллыахтара.
Ыкса сибээһи туппут эрэгийиэн исписэлиистэрэ успуорт саалатыгар түннүк араамаларын уларыппыттар, паркет тэлгээбиттэр, уо.д.а. үлэлэр оҥоһуллубуттар. Сөтүөлүүр сиргэ (бассейнҥа) ууну ыраастыыр тэрил уларытыллыбыт, вентиляция оҥоһуллубут, истиэнэтэ саҥардыллыбыт, сылаас муосталаммыт, уо.д.а. элбэх үлэ ыытыллыбыта бэлиэтэнэр.
Докучаевскай уонна Саха сирэ түһэрсибит сөбүлэҥнэригэр олоҕуран, 2025 сылга куорат 11 эбийиэгэр үлэ ыытар туһунан былаанаммыта.
Ыкса сибээһи тутар эрэгийиэн массыына суолун, Докучаевскайга пааматынньыктары, мемориаллары өрөмүөннүүр. Маны сэргэ, куорат пааркатын реконструкциялааһыҥҥа оҕолорго былаһаакка уонна воркаут, фудкорт сирэ оҥоһуллуохтара. Исписэлиистэр паарка сиригэр-уотугар уотун-күөһүн оҥоруохтара, пааркаҕа саҥа билиитэ ууруллуоҕа. Маны сэргэ, иһитиннэриллибитинэн куоракка сорох учаастактарга уу ситимин өрөмүөннүүллэр, 2 №-дээх Еленовскай оскуолаҕа түннүктэри уларытыыга үлэ ыытыллар. Саха сирин көмөтүнэн Докучаевскайга оҕо уонна ыччат айымньытын дьиэтэ баар буолуоҕа. Ону таһынан ИТ-кииннээх ыччат киинэ былааннанар.
Санатар буоллахха, Саха сирэ 2024 с. Докучаевскайы кытта ыкса сибээһи тутар. Ааспыт икки сыл устатыгар ыкса сибээс олохтоммут Кировскай куоратыгар Саха сирин өйөбүлүнэн, көмөтүнэн 50 тахса социальнай инфраструктура эбийиэгэ чөлүгэр түһэрилиннэ.
СӨ Ил Дарханын уонна Бырабыыталыстыбатын пресс-сулууспата
Хаартыска : kremlin.ru
Бүгүн, тохсунньу 10 күнүгэр, биллиилээх суруналыыс, уопсастыбаннай диэйэтэл, РФ суруналыыстарын сойууһун, РФ уонна СӨ суруйааччыларын…
Саха сирин олохтоохторун төлөпүөнүнэн түөкүннээһин саҥа, кутталлаах көрүҥэ тарҕаммытын туһунан сэрэттилэр. Түөкүттэр военкомат аатыттан эрийэн,…
Саҥа дьыллааҕы бырааһынньыктар кэннилэриттэн харыйаны көннөрү бөх контейнерыгар бырахпыт буруйдаахтар хас да тыһыынча солкуобайга диэри…
Дойду үрдүнэн 2026 сылга сааһынан ананар страховой биэнсийэ орто кээмэйэ ыйга 27 тыһыынча солкуобайга тэҥнэһиэ.…
СӨ Борокуратуурата дьиэ-уот быраабын көмүскээһин туһунан тулаайах кыыс сайабылыанньатынан бэрэбиэркэни ыытта. Бу туһунан СӨ Борокуратуурата…
Дойду бырабыыталыстыбата Уһук Илин сүрүн эрэгийиэннэрин эбии үбүлээһининэн өйүөҕэ. РФ бырабыыталыстыбатын бэрэссэдээтэлэ Михаил Мишустин тустаах…