Докучаевскайга успуорт уораҕайа тестовай эрэһииминэн үлэтин саҕалаата

Саха сирэ ыам ыйынааҕы бырааһынньыктарга Еленовкаҕа култуура киинин уонна Докучаевскайга «Доломит» успуорт уораҕайын толору чөлүгэр түһэриэҕэ.

Билигин бассейннаах соҕотох успуорт комплекса тестовай эрэһииминэн үлэтин саҕалаата. Бу туһунан Ил Дархан Айсен Николаев Саха» ГТРК ханаалга «Быһа кэпсэтии» биэрии кэмигэр иһитиннэрдэ.

«Мин кыбаарталга биирдэ ДНӨ территориятыгар сылдьабын. Бу сырыыга ДНӨ баһылыга Денис Пушилинныын Докучаевскай куораттааҕы уокуругар эбийиэктэри чөлүгэр түһэрии боппуруоһунан дьарыктаммыппыт. Бу Докучавескай куората эрэ буолбатах, нэһилиэнньэлээх пууннар ахсааннара балайда элбэх.

Билигин бассейннаах соҕотох успуорт уораҕайын толору чөлүгэр түһэрдибит. Тестовай эрэһииминэн үлэлиир: онно спортсменнар дьарыктаналлар, тренажернай саала үлэлиир. Күн-дьыл усулуобуйатын көрөн тупсарыы үлэтэ саҕаланыа. Ыам ыйыгар эбийиэги чөлүгэр түһэрии кэнниттэн үлэҕэ киирэрэ былааннанар», — диэн кэпсиир Айсен Николаев.

Ил Дархан шефтэһии көмө былаанынан Оҕо айымньытын дьиэтин өрөмүөнүн саҕалыыр уонна ыччат ИТ-киинин тэрийэр туһунан эттэ.