Дьокутаат Галина Данчикова Арктика оҕолорун сынньалаҥнарын үбүлээһинин туруоруста

«Артика оҕолоро» бырагыраама чэрчитинэн РФ Госдууматын дьокутаата Галина Данчикова дойду Арктическай зонатын оҕолорун доруобуйаларын бөҕөрһөтүүгэ уонна сынньалаҥнарын тэрийиигэ үбүлээһини улаатыннарар  туһунан туруоруста.

Ол курдук, дьокутаат бэйэтэ үлэлиир Бүддьүөт уонна нолуок кэмитиэтин мунньаҕар 2024 сыллааҕы бүддьүөтү ылыныы чэрчитинэн ыытыллар «Үөрэхтээһини сайыннарыы» бырагырааманы ырытыыга РФ үөрэхтээһиҥҥэ миниистирэ Сергей Кравцовтан Арктика оҕолоро» бырагыраама үбүлээһинэ тоҕо толору кээмэйинэн ыйыллыбатаҕын ыйытта.

Быйыл 292 оҕо доруобуйатын бөҕөргөттө. Ол эбэтэр Саха сирин арктическай оройуоннарыгар олорор 5-8 кылаас үөрэнээччилэрин 8%-на эрэ хабылынна. Миниистир хоту эрэгийиэн дьокутаатын санаатын истэн баран, кырдьык, бырагыраама олус суолталааҕын бэлиэтээтэ. Министиэристибэ салалтата иһитиннэрбитинэн, Экэнэмиичэскэй  сайдыы  министиэристибэтин кытта тустаах үлэ барар. Онон сокуон бырайыагын иккис ааҕыытыгар эбии көннөрүү үбүлээһини улаатыннарыыга киирэн биэриэҕэ.