Дьокутаат оруола хаһааҥҥытааҕар да улааппыт

Дьокуускайга муниципальнай тэриллиилэр бэрэстэбиитэллээх уорганнарын дьокутааттарын үһүс сийиэһэ буола турар.

“Муниципалитеты 2.0: ИИ как драйвер развития территорий” муниципальнай хамаандалар пуорумнарыгар дьокутаат нэһилиэнньэни кытта аныгы кэмҥэ хайдах үлэлиэҕин сөбүн быһаарар лиэксийэлэр, хамаанданан сорудахтар ыытылыннылар.

Пуорум кыттыылаахтарын Ил Түмэн вице-спикерэ Афанасий Владимиров эҕэрдэлээтэ. Ол кэнниттэн Ил Түмэн иһинэн Ыччат парламенын бэрэссэдээтэлэ, “Саха” НКИК интернет-иһитиннэриитин сулууспатын начаалынньыга Антон Васильев муниципальнай дьокутаат бэйэтин нэһилиэгэр лиидэр, аһаҕас былаас систиэмэтигэр позициялаах буолуохтааҕын, социальнай ситимнэр үйэлэригэр былаас үлэтин тута быһаара, иһитиннэрэ сылдьыахтааҕын, о.д.а.  туһунан лиэксийэ аахта.

Муниципальнай дьокутаат оруола билигин хаһааҥҥытааҕар да улааппыт. Кини дьону кытта үлэлиэхтээх, тугу этэллэрин истиэхтээх, аныгы олох тэтимин кытта тэҥҥэ баран иһиэхтээх. Ону таһынан аһаҕас былаас таһаарар сонуннарын, сокуоннарын бастакынан нэһилиэнньэҕэ тиэрдэн, быһааран биэриэхтээх. Оччоҕо эрэ социальнай ситиминэн тарҕанар утары информацияны бохсуон сөп.  Онно аныгы технологиялары туһаныан наада. Холобур, нэһилиэнньэни кытта үлэҕэ оҥоһуу өйү хайдах туһаныахха сөбүй диэтэххэ, хайа эрэ боппуруоска көрбүт киһи тута өйдүүрүн курдук алгоритмнаах улахан исхиэмэ оҥоһуллуон сөп. Оччоҕо хас биирдии киһиэхэ быһаара турбакка, элбэх киһини хабар судургу мэхэньиисим баар буолар.