Дьокутааттар хотугу таһаҕаһы таһыыга олохтоох бэйэни салайыныы уорганнарын боломуочуйаларын туһунан көрдүлэр

Ил Түмэн уочараттаах пленарнай мунньаҕар парламент экэниэмикэҕэ, инвестицияҕа уонна бырамыысыланнас бэлиитикэтигэр сис кэмитиэтин бэрэссэдээтэлэ Павел Петров көрдөһүүтүнэн, бэбиэскэҕэ 55 уонна 56 боппуруостарынан турбут «Хотугу таһаҕаһы тиэйии-таһыы туһунан» уонна «РФ тустаах сокуон суолталаах аакталарыгар уларытыылары киллэрэр туһунан» Федеральнай сокуоннар барылларыгар Ил Түмэн көннөрүүлэрин туһунан уураахтар көрүлүннүлэр.

Бу сокуоннар бырайыактара муус устар 20 күнүгэр Судаарыстыбаннай Дуума көрүүтүгэр киирэринэн, норуот дьокутааттара биир киһи курдук куоластаан аһардылар. Хотугу таһаҕаһы таһыы сокуонун бырайыагар биэс көннөрүү киирдэ.

Ол иһигэр субъектарга сыананы, тарыыптары уонна ааҕыы методикатын бэрээдэктиир быраабы биэрэргэ этиллэр. Дойду субъектарын судаарыстыбаннай былааһын уорганнарыгар хотугу таһаҕаһы таһыы чэрчитинэн, бастакы категориялаах таһаҕаска сыананы (тарыыптары, надбавкалары) бэрээдэктээһин уонна сыананы хонтуруоллааһын боломуочуйатын киллэрэргэ этиллэр. Итини таһынан 7 ыстатыйа 6 чааһын устарга, 13 ыстатыйатыгар уларытыылары киллэрэргэ этиллибит.

Түмүккэ, парламент экэниэмикэҕэ, инвестицияҕа уонна бырамыысыланнас бэлиитикэтигэр сис кэмитиэтин бэрэссэдээтэлэ Павел Петров Саха сиригэр улахан суолталаах, наадалаах хотугу таһаҕаһы тиэйии-таһыы туһунан сокуон барылын өйөөбүттэрин иһин бииргэ үлэлиир дьокутааттарыгар махтанарын биллэрдэ.