Дьокутааты успуорка туох долгутарый?

Судаарыстыбаннай Дуума дьокутаата Галина Данчикова эрэгийиэн нэдиэлэтин уонна дойду эрэгийиэннэригэр “Биир Ньыгыл Арассыыйа” баартыйа норуодунай бырагырааматын олоххо киллэрии иитинэн, Дьокуускай куорат Марха түөлбэтигэр соторутааҕыта үлэҕэ киирбит бассейннаах уонна сабыылаах хаҥкылыыр сирдээх “Сулус” физкультурнай-чэбдигирдэр комплекска сырытта. “Сулус” диэн ааты куоластааһын нөҥүө олохтоохтор бэйэлэрэ талбыттар.

Успуорт эбийиэгэ Саха сиригэр үлэлиир “Газром” ПАУо суотугар “Газпром — оҕолорго” бырагырааманан тутуллубут. Саҥа комплекска харбааһын, хоккей, фигурнай хаҥкы, шорт-трек көрүҥнэринэн, маассабай хаҥкылааһынынан дьарыктаныахха сөп. Аныгы эбийиэк үлэтин иһиттэн көрдөрбүт өрөспүүбүлүкэтээҕи успуорт оскуолатын дириэктэрэ Петр Черкашин, солбуйааччыта Юрий Баишев этэллэринэн, элбэх киһи сылдьар эбит. Аһыллыаҕыттан номнуо 21 тыһ. тахса куорат олохтооҕо кэлэн барбыт. Өҥө оҥорорго 5 оскуоланы уонна 6 чааһынай тэрилтэни кытта сөбүлэҥ түһэрсибиттэр.

Искусственнай муустаах, 150 киһи тэҥинэн хатааһылыыр кыахтаах хаҥкылыыр сиргэ, 25 миэтэрэлээх бассейнҥа, доруобуйаларынан хааччахтаах дьоҥҥо суоттаммыт кыра бассейнҥа, харбааһыҥҥа бэлэмнэнэргэ сөптөөх кураанахтыы харбыыр (сухой бассейн) сиргэ сүрүннээн Гагарин уокуругун, Марха, Жатай, Маҕан түөлбэ олохтоохторо сылдьаллар. Кинилэртэн чугас турар уонна успуорт хас да көрүҥэр өҥө оҥорор буолан табыгастаах.

Галина Данчикова доруобуйаларынан хааччахтаах дьон бөҕөргөтүнэллэригэр төһө табыгастааҕын туһунан сиһилии ыйыталаста. Кэпсэтиигэ кыттыбыт СӨ успуордун уонна физическэй култууратын миниистирин бастакы солбуйааччы Александр Бугаев хааччаҕа суох эйгэни тэрийэргэ эбийиэк бары өттүнэн толкуйдаммытын туһунан дьокутааты итэҕэттэ. Тустаах уораҕайга киирэр былаһааккаларга пандустар бааллар, ааннар кэлээскэлээх дьон киирэллэригэр суоттаммыттар. Таҥас уларыттар уонна атын хосторго доруобуйаларынан хааччахтаах дьоҥҥо аналлаах туспа хостордоох. Сууккаҕа 1038 киһи сылдьар кыахтаах.

Физическэй култуура туһунан салгыы комплекс дириэктэрин хоһугар кэпсэттилэр. Дьокутаат, миниистири солбуйааччы Александр Бугаевтан хас улууска успуорт былаһаакката баарын, дьон төһө сылдьарын туһунан сиһилии иһитиннэриини бэлэмнииригэр көрдөстө.

Дьокуускай куоракка успуордунан, доруобуйаны бөҕөргөтүүнэн дьарыктанар кыах оҕолорго да, улахан дьоҥҥо даҕаны элбэх, тыа сиригэр талар кыах аҕыйах. Турникка көннөрү тардынан ылар, футболлуур кыах суох биирдиилээн нэһилиэнньэлээх пууннарыгар успуордунан дьарыктанарга усулуобуйаны тэрийиэххэ наада. Судаарыстыбаннай Дуума дьокутаата Галина Данчикова долгуйар, көннөрү успуорт былаһааккаларыттан саҕалыыр наада диэн этэр.

Дьокутаат “Сир аннынааҕы баай туһунан” РФ Сокуонугар сиртэн хостонууну туһанааччылар тулалыыр эйгэни харыстааһыҥҥа ирдэбиллэри толорууларыгар сыһыаннаах уонна РФ субъектара социальнай-экэнэмиичэскэй өттүнэн сайдыыларыгар кытталларын туһунан уларыйыылар киирэллэригэр эрэллээх. Дойду үгүс эрэгийиэннэригэр РФ субъектарын судаарыстыбаннай былааһын уорганнарын, муниципалитеттарын уонна социальнай эппиэтинэстээх сиртэн хостооһунунан дьарыктанааччы икки ардыгар социальнай-экэнэмиичэскэй сайдыыга сөбүлэҥ түһэрсиллэр. Бу сөбүлэҥ биисинэс уонна былаас бииргэ үлэлэһиилэрин биир дьайыылаах ньыматынан буолар. Ол эрээри, бу сиртэн хостон баайы туһанааччыттан тутулуктаах уонна сокуонунан ыйыллыбат.

Галина Данчикова маны сыыһа дии саныыр. “Сир аннынааҕы баай туһунан” сокуоҥҥа уларытыылары киллэрии көрүҥүн быһыытынан этиилэр Судаарыстыбаннай Дуумаҕа өйөммөтөҕүн да иһин, дьокутаат бэбиэскэтиттэн тустаах боппуруос түспэт диэн этэр.