Дьокуускай 13 №-дээх оскуолатыгар «Дьоруой паартата» баар буолла

Аҕа дойдуну көмүскээччи күнүн чэрчитинэн Дьокуускай 13 №-дээх оскуолатыгар байыаннай дьайыыга кытта сылдьан сырдык тыынын толук уурбут оскуола выпускнига, «Эр санаа» уордьан кавалера Андрей Александрович Плотников кэриэһигэр «Дьоруой паартата» баар буолла.

Тэрээһиҥҥэ оскуола дириэктэрэ Иосиф Слепцов «Дьоруой паартата» оскуолаҕа олус улахан суолталааҕын бэлиэтээтэ. Андрей Плотников туһунан өйдөбүл эдэр көлүөнэҕэ холобур буолуоҕа уонна кинилэри үтүө дьыалаҕа, хорсун быһыыны оҥорорго сирдиэҕэ диэтэ. Иосиф Михайлович «Дьоруой паартата» оҕолор үрдүккэ талаһар, ону сэргэ патриотизмы сайыннарар уонна дьоруойдарга ытыктабыллаахтык сыһыаннаһар миэстэлэринэн буолуо диэн эрэнэрин биллэрдэ.

«Биһиги оскуолабыт үгэстэрин харыстыыбыт, кэҥэтэбит уонна историятынан киэн туттабыт! Биһиги дьоруойдарбытын кэриэстиибит! Кинилэри үйэлэр тухары өйдүү-саныы сылдьыахпыт!» — диэтэ дириэктэр Иосиф Слепцов.

Бэлиэ тэрээһиҥҥэ Андрей Плотников ийэтэ Людмила Николаевна Мотурина, Дьокуускай Дууматын дьокутаата, Дьокуускай аҕаларын сэбиэтин бэрэссэдээтэлин солбуйааччы Яков Оконешников, куорат үөрэҕин управлениетын иитиигэ уонна эбии үөрэхтээһиҥҥэ отделын кылаабынай исписэлииһэ Айсен Ефремов, Бырамыысыланнай уокурук управатын салайааччыта Семен Иванов, аҕалар сэбиэттэрин бэрэссэдээтэлэ Егор Попов, ИДьМ бэтэрээнэ, Хотугу Кавказ байыаннай дьайыытын кыттыылааҕа, бэтэрээнэ, байыаннай дьайыы кыттыылааҕа Сергей Курамшин кыттыыны ыллылар.

«Дьоруой паартатыгар» бастакынан 6-с «В» кылаас үөрэнээччилэрэ, үөрэх туйгуна Дарья Замащикова уонна оскуола уопсастыбаннай олоҕор көхтөөх кыттааччыта Адилет Капаров олорор чиэскэ тигистилэр.

Андрей Плотников сырдык кэриэһигэр анаммыт кроссфит күрэхтэһиитигэр 8-11 кылаас оҕолоро кытыннылар. Кинилэр успуорт 5 көрүҥэр күрэхтэстилэр.

Күрэхтэһии түмүгүнэн маннык миэстэлэргэ тигистилэр:

8-9 кылаастарга:
1 миэстэ — Дима Емельченко (9 «А»кылаас);
2 миэстэ — Давид Зуев (8 «Б» кылаас);
3 миэстэ — Роман Лощилов (8 «Б» кылаас)

9-11 кылаастарга:
1 миэстэ — Абдулкарим Еров (9 «Г» кылаас);
2 миэстэ — Максим Костылев (9 «Б» кылаас);
3 миэстэ — Иван Гомзяков (9 «Г» кылаас).

Байыастар оҕолоро кыттыылаах оскуола тыйаатыра «Дьоруойдар ыллыктарынан» оонньууну көрдөрдүлэр. Эбии үөрэхтээһин педагога А.С. Молонова салайыытынан оҕолор Арассыыйа дьоруойдарын олохторун, кинилэр хорсун быһыыларын хоһуйууну иһитиннэрдилэр. Ону тэҥэ аһымал аахсыйаҕа оҕолор байыаннай дьайыыга ыытарга анаан харыстыыр сиэккэни баайдылар.

#ГодЗащитникаРодиныРСЯ #ГодЗащитникаОтечестваРФ #ПартаГероя #ПлотниковАндрей #ОрденМужества #Герой

Хаартыскалар: И.Слепцов тиксэриилэрэ