Дьокуускай 13-с №-дээх оскуолатыгар Тыл уонна сурук-бичик күнүгэр ураты тэрээһин буолан ааста

Бэҕэһээ Дьокуускай куорат 13-с №-дээх оскуолатыгар Тыл уонна сурук-бичик күнүгэр аналлаах ураты тэрээһин буолан ааста. Бу оскуолаҕа элбэх араас омук оҕолоро үөрэнэллэр.

Сарсыарда эрдэттэн оскуолаҕа учууталлар уонна үөрэнээччилэр сахалыы таҥнан-симэнэн кэлэннэр, бырааһынньыктыы тыынын күүркэтэн биэрдэ. Үөрэнээччилэр да, учууталлар да тэрээһиҥҥэ үөрэ-көтө көхтөөхтүк кытыннылар.

Тыл уонна сурук-бичик күнүн тэрээһинин оскуола дириэктэрэ, анал байыаннай дьайыы кыттыылааҕа Иосиф Слепцов эҕэрдэ тылынан аста.

«Төрөөбүт тыл уонна сурук-бичик күнүнэн барыгытын эҕэрдэлиибин! Төрөөбүт тылгыт бэйэ-бэйэни кытта кэпсэтэр эрэ ньыма буолбакка, өбүгэлэригит ураты бэлиэтэ, култуурунай баайгыт уонна сомоҕолоһуугут туоһута буоллун. Төрөөбүт тылгытын харыстааҥ, сайыннарыҥ, норуот историята, тыына манна баар», — диэтэ дириэктэр Иосиф Слепцов.

Ол кэннэ кэлбит ыалдьыттары музыкальнай нүөмэрдэринэн «Сияние Севера» хомус ансаамбыла, «Контраст» норуоттар икки ардыларынааҕы үҥкүү устуудьуйата, 6-с кылаас үөрэнээччилэрэ Валера Дмитриев уонна Мичийээнэ Архипова «Доҕорбор» ырыанан, «В семье единой» хоһоон ааҕааччылар бөлөхтөрө эҕэрдэлээтилэр.

Салгыы оскуола учууталлара уонна төрөппүттэрэ сахалыы тылынан Кыайыы дьыктаанын суруйдулар. Тыл уонна сурук-бичик күнүгэр бырааһынньыгын илии-илиитэн тутуһан, үгэс буолбут оһуокайынан түмүктээтилэр.