Дьокуускай 35-с №-дээх оскуолатыгар 10-с кылааска куонкуруһунан ылыы сокуоннайын бэрэбиэркэлииллэр

Дьокуускайга 35-с №-дээх оскуола 10-с кылаастарыгар үөрэнээччилэри ылыыга сокуон кэһиллибит буолуон сөбүн туһунан иһитиннэриилэринэн бэрэбиэркэ саҕаланна.

Бэрэбиэрэкэ ыытыллар төрүөтүнэн булгуччулаах орто уопсай үөрэххэ киириини хааччахтыыр куонкурус нөҥүө сүүмэрдээһин ыытылларын утары төрөппүттэр үҥсүүлэрэ буолла.

Бу туһунан Саха сирин Борокуратууратын пресс-сулууспата иһитиннэрдэ. РФ Конституциятынан орто уопсай үөрэхтээһин (10-11 кылаастар) бары үөрэнээччилэргэ хааччахтаммакка, тиийимтиэ буолуохтаах. Ол эрээри 35-с №-дээх оскуолаҕа, төрөппүттэр этэллэринэн, үрдүкү кылаастарга куонкурус тэрийэн ылар буолбуттар.

Киин куорат борокуратуурата балаһыанньаны үөрэтэр уонна чугастааҕы кэмҥэ оскуола дьаһалтатын дьайыыларыгар сыанабыл биэриэҕэ. Өскөтүн сокуону кэһиилэр тахсыбыттара бигэргэннэхтэринэ, үөрэх кыһатын салалтата административнай эппитинэскэ тардыллыан сөп.