Дьокуускай 39 №-дээх оскуолатын остолобуойа Бүтүн Арассыыйатааҕы күрэх лауреата буолла

Ленинградскай уобаласка «Бастыҥ оскуола остолобуойа» Бүтүн Арассыыйатааҕы күрэх түмүктэннэ. Саха сирин аатыттан Дьокуускай куорат Н.И. Шарин аатынан 39 №-дээх оскуолатын остолобуойа кыттан, күрэхтэһии түмүгүнэн лауреат аатын ылла.

Саха сирин хамаандата дьүүллүүр сүбэҕэ оҕуруот аһыттан фриттатаны, кууруссалаах уонна оҕуруот астаах пастаны, уулаах отон  соустаах ириистэн биточкалары, кыһыл балыктан уонна чыыртан оҥоһуллубут фишболлары уонна оскуола менютуттан атын да астары билиһиннэрдэ.

«70-тан тахса эрэгийиэнтэн оскуолалар кыттыбыт күрэхтэрэ — биһиэхэ сыаналаах уопут, дойду үрдүнэн үлэлиир дьоммут бастыҥ ньымаларын көрөр, ону таһынан бэйэбит сатабылбытын көрдөрөр кыах буолар. Маннык элбэх кыттааччыттан лауреат аатын ылыы – улахан ситиһии. Бу биһиги үөрэнээччилэри доруобай уонна куттала суох аһылыгынан хааччыйыыга үрдүк стандартары тутуһарбытын өссө төгүл туоһулуур», — диэн этэр оҥорон таһаарыы сэбиэдиссэйэ, «ЦРО» МАУ технолога Анастасия Боярская.

«Бастыҥ оскуола остолобуойа» Бүтүн Арассыыйатааҕы күрэх үөрэнээччилэр аһылыктарын хаачыстыбатын үрдэтиигэ, кулинарнай бородууксуйаны оҥорон таһаарыыга саҥа технологиялары киллэриигэ, хаачыстыбалаах уонна сөптөөх аһылыгы тэрийии аныгылыы ньымаларын тарҕатыыга туһуланар. Ону таһынан, күрэх оскуола остолобуойдарын бастыҥ уопуттарын уонна доруобай аһылык бириинсиптэрин тарҕатарга, пуобардары көҕүлүүргэ кыах биэрэр. Күрэх төрүттээччитэ – Үөрэҕирии министиэристибэтэ, тэрийээччитэ – Үөрэнээччилэр аһылыктарын кэтээн көрөр федеральнай киин.