Дьокуускай — Аллараа Бэстээх хайысханан боруобаҕа паромнар тахсыахтара

Бүгүн, ыам ыйын 22 күнүгэр, Дьокуускай-Аллараа Бэстээх хайысханан боруобаҕа бастакы паромнар үлэҕэ тахсыахтара.

Ол туһунан Тырааныспарга уонна суол хаһаайыстыбатыгар министиэристибэтигэр иһитиннэрдилэр.

«Сарсыардаттан паромнар тестовай эрэсииминэн үлэлиэхтэрэ, суол тиэхиньикэтин таһыахтара», — диэн иһитиннэриигэ биэдимистибэ биллэрэр.

Бастакы түһүмэххэ аҕыс паром үлэҕэ тахсара былааннанар. Оттон сыыйа ахсаанын 14-кэ диэри улаатыннарыахтара. Олохтоох дьон тырааныспарын таһыыта анал тиэхиньикэни таһыы кэнниттэн ыытыллыаҕа диэн министиэристибэҕэ бэлиэтэннэ.