Дьокуускай-Аллараа Бэстээх хайысханан өрүс суола хаһан сабылларый?

Дьокуускай — Аллараа Бэстээх хайысханан өрүс суолунан сырыы 30 туоннаҕа диэри уйуктаах тырааныспардарга намтаата, оттон муус устар 10 күнүттэн — 20 туоннаҕа диэри.

Халлаан туругуттан көрөн, өрүс үрдүнэн кыһыҥҥы айан-сырыыны муус устар 15-17 күннэригэр тохтотулларын былаанныыллар. Бу туһунан СӨ Тырааныспарга уонна суол хаһаайыстыбатын миниистирин солбуйааччы Семен Коркин «Якутия 24» ханаалга «Актуальное интервью» биэриигэ иһитиннэрдэ.

«Халлаан сылыйан, ириэрии бөҕө буолла. Бүгүҥҥү туругунан Дьокуускай — Аллараа Бэстээх айан-сырыыга хааччахтар олохтоннулар. Онон тырааныспар сырыытыгар балаһыанньаттан көрөн, сөптөөх быһаарыы ылыныахпыт. Бүгүҥҥү күҥҥэ Дьокуускай — Аллараа Бэстээх хайысханан сырыы кыраапык быһыытынан баран иһэр. Өрүс суолунан сырыы 30 туоннаҕа диэри диэри уйуктаах тырааныспардарга намтаата, оттон муус устар 10 күнүттэн — 20 туоннаҕа диэри», — диэтэ Семен Коркин.

Онуоха кини Хатас-Павловскай хайысханан кыраапык уларыйбытын туһунан бэлиэтээтэ, онон 10-с чыыһылаҕа өрүс суолунан сырыы 10 туоннаҕа диэри уйуктаах тырааныспардарга намтыаҕа.

«Билиҥҥитэ Хатас-Павловскай хайысханан айан-сырыы хааччахаҕа суох. Халлаан туругун салгыы кэтээн көрөбүт. Бэдэрээтчит күннэтэ дааннайдары саҥардар, суһаллык быһаарыы ылынар туһугар үлэлиир. Дьиҥэр, эрдэтинэ суолу муус устар 3 күнүттэн тохтотор былааннаммыта», — диэн Семен Коркин чопчулаата.

Санатан эттэххэ, күн-дьыл туруга мөлтөөбүтүнэн уонна халтараанынан сибээстээн Саха сирин оройуоннарыгар оптуобус рейстэрэ муус устар 3 күнүгэр, ону тэҥэ муус устар 4 күнүгэр тохтотуллубута.