«Дьокуускай-Аллараа Бэстээх» хайысханан паром сырыыта саҕаланна

Бүгүҥҥүттэн, ыам ыйын 26 күнүттэн, «Дьокуускай-Аллараа Бэстээх» хайысханан паром сырыыта саҕаланна. Бу туһунан СӨ Тырааныспарга министиэристибэтэ иһитиннэрэр.

Бу хайысханан барыта аҕыс паром күннэтэ тырааныспардары уонна пассажирдары таһыаҕа. Сотору кэминэн 15 паром сылдьара күүтүллэр. Сырыы сарсыарда 6 чаастан киэһэ 23 чааска диэри буолуоҕа.

Ааспыт сылы кытта тэҥнээтэххэ, кыра ыйааһыннаах тырааныспары тиэйии сыаната үрдээбит. Кэмитиэт быһааран этэринэн, бу сылтан ыла тырааныспар ыйааһыныттан буолбакка, паром палубатыгар сабардыыр миэстэтиттэн төлөбүрү ааҕыыга көһүү саҕаланыа. Бу курдук суоттааһынтан сылтаан легковой массыынаны тиэйии төлөбүрэ үрдээбит. Таһаҕас тиэйэр улахан массыыналары туоратыы төлөбүрэ 2022 сыл таһымыгар хаалбыт.

Бүгүҥҥү күн туругунан тиэйии төлөбүрэ бу курдук буолбут:

1,5 туонна ыйааһыннаах тырааныспар – 650 солк. (эрдэ 500 солк. этэ);

1,501 туоннаттан 2,0 туоннаҕа диэри – 950 солк.;

2,001 туоннаттан 2,3 туоннаҕа диэри – 1100 солк.;

2,301 туоннаттан ыарахан тырааныспар – 1400 солк.

Тырааныспар министиэристибэтэ биллэрэринэн, «Хачыкаат-Мохсоҕоллоох» хайысханан 4 паром, Алдан өрүһүнэн «Мэҥэ Алдан-Кэскил» хайысханан 3 паром уонна Бүлүү өрүһүнэн 4 сиринэн 15 паром айанныыра күүтүллэр.

«Кангаласс-Суотту» хайысханан паром сырыыта ыам ыйын 27-29 күннэриттэн саҕаланыаҕа.