Дьокуускай — Аллараа Бэстээх хайысханан паром сырыыта түмүктэннэ

Сэтинньи 1 күнүттэн Дьокуускай — Аллараа Бэстээх хайысханан паром сырыыта тохтотулунна. Муус туруутун кэмигэр сырыы Жатай – Төхтүр хайысханан оҥоһуллуо, диэн ЯСИА иһитиннэрэр.

«Сэтинньи 1 күнүттэн Дьокуускай- Аллараа Бэстээх хайысханан паром сырыыта тохтоото. Сырыыны Жатай – Төхтүр маршрутунан «ЛОРП» ПАУо хампаанньа оҥоруоҕа. Биһиги паромнарбытын аныгыс навигацияҕа бэлэмнэниэхпит уонна аал өрөмүөнүн былаанныыбыт. Кытылга хаалбыт хас да массыынаны таһаарарга, соторутааҕыта икки паром буксирдарынан арыаллатан Аллараа Бэстээх диэки барбыта. Кинилэри Дьокуускайга таһаарыахпыт. Бүгүн кассалар кыһыҥҥы кэмҥэ сабыллыахтара», — диэн «Саха сирин паромнара» ХК салайааччыта Николай Ефимов ЯСИА-ҕа кэпсээтэ.

Санатан эттэххэ, алтынньы 16 күнүттэн Дьокуускай-Аллараа Бэстээх маршрутунан «Хивустар» сылдьаллар. Дьокуускайтан  204-с микрооройуоҥҥа баар «Намыв» ыстаансыйаттан айанныыллар. 20-чэ салгын сыттыктаах аал үлэлиир.