«Дьокуускай-Аллараа Бэстээх» хайысханан паром тохтуур сиригэр бетону кутуу былааннанар

СӨ Тырааныспарга уонна суол хаһаайыстыбатыгар министиэристибэтэ «Дьокуускай – Аллараа Бэстээх» паромунан туоруур сир инфраструктуратын тупсарар дьаһаллары олоххо киллэриини салгыыр.

Бу үлэ чэрчитинэн өрөспүүбүлүкэтээҕи биэдэмистибэ Дьокуускай куорат дьаһалтатын бэрэстэбиитэллэрин кыттыылаах көһө сылдьар мунньаҕы ыытта.

Олоххо киирбит дьаһаллартан биирдэстэринэн Марха түөлбэ аттынааҕы суол учаастагын саҥардыыта ыытыллыбыт. Бу массыыналар паромҥа киириэхтэрин иннинэ эргийэр сирдэрин кэҥэтэргэ кыах биэрдэ. Билигин улахан ыйааһыннаах тырааныспарга эргийэргэ уонна «накопительга» чугаһыырга чэпчэки буолла. Туһанааччыларга табыгастаах буоларын үрдэтээри, быһаччы кытылга анал стационарнай терминаллар нөҥүө төлөбүрү ылыыны тэрийэр үлэ ыытыллар. Бу суоппардарга уонна пассажирдарга айан төлөбүрүн судургутутуоҕа.

Ону таһынан, «накопительга» киирэр зонаны кэҥэтэргэ мэһэйдиир уот ситимин үс остуолбатын көһөрөргө быһаарылынна.

Эбии тупсарыы үлэ чэрчитинэн «накопительга» бетон бүрүөһүнү тэлгэтии кыах көрүллэр.