Дьокуускай — Аллараа Бэстээх хайысханан паромнар төһө туолбуттарынан сылдьар буоллулар

Дьокуускай – Аллараа Бэстээх хайысханан паромнар алтынньы 20 күнүттэн  кыраапык быһыытынан буолбакка, төһө туолбуттарынан сылдьар буоллулар.

Сайыҥҥы тарыып үлэлиир. Тарыып сотору уларыйыан сөп, диэн «Паромы Якутии» салайар хампаанньа салайааччыта Николай Ефимов иһитиннэрдэ.

«Билиҥҥи туругунан «Паромы Якутии» аҕыс парома уонна АЯМ тутааччыларын Ассоциациятын үс парома үлэлииллэр. Сотору кэминэн үскэ диэри аҕыйыаҕа. Бэнидиэнньиктэн паромнар төһө туолбуттарынан үлэлииллэр. Сайыҥҥы тарыыптар уларыйбатылар. Муус туругуттан көрөн уонна паромнар ахсааннара аҕыйаатаҕына атын тарыыпка көһүөхтэрэ. Билигин өрүскэ балаһыанньа үчүгэй, ол эрээри  күн-түүн уларыйыан сөп», – диэн Николай Ефимов кэпсээтэ.

Сайыҥҥы тарыыптар: кыра массыынаҕа – 1150 солкуобайтан саҕалаан, оттон саамай улахан таһаҕас массыынатыгар – 13 100 солкуобай буолар. Кыра массыынаҕа тарыып  мааркатыттан уонна кээмэйиттэн тутулуктанан 4000-тан 12 000 солкуобайга диэри уларыйыаҕа. Фураҕа — 65 000 солкуобайга диэри.