Дьокуускай-Аллараа Бэстээх хайысханан саҥа хампаанньа үлэлээтэ

Өлүөнэ өрүһү туорааһын — Өлүөнэ эбэ уҥуоргу олохтоохторугар эрэ буолбакка, бүтүн өрөспүүбүлүкэҕэ олус наадалаах уонна ыарыылаах боппуруос. Паром туорааһыныгар улахан уочараттар уонна араас айдааннаах түгэннэр номоххо киирбиттэрэ ыраатта.

Улахан паромнартан ураты Дьокуускай – Аллараа Бэстээх хайысхатыгар кыра кээмэйдээх аалларынан дьону таһыы эмиэ баар. Урут бу өҥө ырыынагар, дьиҥинэн, күрэстэөии суоҕа, онтон бу сайын саҥа тэрилтэ — саха уолаттарын «Сулус» хампаанньа үлэтин саҕалаата. Түмүгэ соторунан билиннэ. Ол курдук, Өлүөнэ эбэни кыра кээмэйдээх аалынан туоратыы сыаната биллэ чэпчээтэ. Чөл күрэстэһии бастатан туран, биллэн турар, пассажирдарга туһалаах. Ол эрээри, хомойуох иһин, соторутааҕыта хампаанньалар икки ардыларыгар дьону олордор уонна түһэрэр сир туһунан өйдөспөт буолуу мөккүөрэ тахса сырытта.

Бу үөскээбит балаһыанньа туһунан норуот дьокутаата, А.Д. Макарова аатынан Дьокуускайдааҕы култуура кэллиэһин дириэктэрэ Захар Никитин бэйэтин ТГ-ханаалыгар маннык суруйан сырдатта: «Аҕыйах күннээҕитэ Өлүөнэ эбэбитин туоратар түргэн аалларга саҥа «Сулус» диэн хампаанньа киирэн, эбэни туоратыы сыаната икки төгүл аччаабытын туһунан сурах тарҕаммытын бары даҕаны олус үөрэ истибиппит. Ол эрэн, хомойуох иһин, бу күннэргэ миэхэ саҥа хампаанньа утары «кирдээх» ньымаларын туһанан туората сатыылларын туһунан хас да этии киирдэ. Ол курдук, речпорт аттыгар баар кыра кээмэйдээх уу ааллара тиксэр сирдэригэр бэҕэһээҥҥи дылы икки хампаанньа катердара тохтуур эбит буоллахтарына, бүгүн кэлэн, «Сулус» хампаанньа катердара тиксэллэрэ бобуллан, ыраах дамба таһыттан таһарга күһэллибиттэр. Бу олохтоох өҥөнөн туһанааччыларга үгүс харгыстары үөскэтэр. Хара маҥнайгыттан речпорт аттыгар тиксэргэ сөбүлэҥ оҥорсубут хампаанньа утары сөбө суох быһыы-майгы тахса турарын туһааннаах уорганнар болҕомтолоругар хайаан да ылыллыахтаах. Правовой судаарыстыбаҕа олорорбут быһыытынан маннык боппуруостар сокуон хараҕынан көрүллүөхтээхтэр… Сорох куйаар ситимигэр бу тахса турар быһыыны-майгыны араастаан күөттээн суруйаллар, дьону-сэргэни бутуйаллар. Ол эрэн, бу бастатан туран, икки таһар тэрилтэ, чөл күрэстэһиигэ өйдөспөтөхтөрүн түмүгэр тахсыбыт балаһыанньа. Онон араастаан эргитэн суруйуу табыллыбатын уонна сокуону кэһии курдук көрүллүөн сөбүн өйдүөххэ наада».

Ити мөккүөрүнэн от ыйын 28 күнүгэр балаһыанньаны быһаарар сүбэ мунньах ыытылынна. Мунньахха «Сулус» уонна «ЛенаВодСервис» хампаанньалар, СӨ Тырааныспага миниистирин солбуйааччы Семен Коркин, Мэҥэ Хаҥалас улууһун баһылыга Дмитрий Тихонов, Ил Түмэн дьокутааттара, тырааныспар борокуратууратын уонна «Ленатурфлот» бэрэстэбиитэллэрэ кытыннылар. Икки күрэстэһээччи икки ардыгар үөскээбит мөккүөр уонна «Сулус» катердарыгар өрүс пуордун биригээдэтигэр тохтуур кыаҕы бобуу боппуруоһа көрүлүннэ. Түмүгэр, икки өрүт санаатын истэн, балаһыанньаны сааһылаатылар. Мунньах кэнниттэн «Сулус» хампаанньа өрүс пуордун биригээдэтиттэн дьону таһыытын сөргүтэн, үлэтин салҕаата.

«Биллэн турар, сорох ситэ быһаарыллыбатах боппуруостар бааллар. Ол эрэн, барыта этэҥҥэ буолан икки хампаанньа тэҥ усулуобуйаҕа үлэлиэхтэрэ диэн эрэл баар. Инникитин үлэ хайдах барарын кэтээн көрүөхпүт, бу боппуруоһу тус хонтуруолбар ылан салҕыы үлэлэһиэм», — диэн дьокутаат Захар Никитин эбэн эттэ.

Бу кэмҥэ саҥа хампаанньаны өйөөн, от ыйын 29 күнүттэн Мэҥэ Хаҥалас улууһун араас нэһилиэктэрин эр дьоно биир санаанан түмсэн, айан усулуобуйатын тупсарар соруктаах Аллараа Бэстээх биэрэгэр тутуу үлэтин саҕалаатылар. Уолаттар ардахтан-тыалтан хаххалыыр дьиэ, биэрэккэ түһэр кирилиэс, туалет, ыскаамыйалар матырыйаалларын норуот күүһүнэн хомуйан, субуотунньук тэринэн, бу нэдиэлэ устата тутан бүтэрэр былааннаахтар. Маннык үтүө саҕалааһын дьон сүргэтин көтөҕөр, түмсүүгэ-сомоҕоҕо ыҥырар. Бу туһунан Мэҥэ Хаҥалас улууһун дьаһалтатын пресс-сулууспата иһитиннэрдэ.