Хаартыска: Саргын Скрябин, СИА
Сарсыҥҥыттан, муус устар 16 күнүттэн, Дьокуускай — Аллараа Бэстээх маршрутунан салгын олбохтоох суудуналар айанныахтара. Айан-сырыы сыаната 2500 солк. буолуоҕа, оттон өрүскэ балаһыанньа мөлтөөтөҕүнэ сыаната 5000 солк. диэри үрдүөҕэ.
Чэпчэтиилэр кимиэхэ көрүллэллэрин туһунан СИА-ҕа «ЛенаВодСервис» хампаанньа биригэдьиирэ Борис Строев кэпсээтэ.
«Дьокуускай-Аллараа Бэстээх маршрутунан айан-сырыы сыаната 2500 солк. буолуоҕа, ити ааспыт сыллааҕар 500 солк. үрдүк. Сыана үрдээһинэ сүрүннээн уматык, саппаас чаас сыаната үрдэбитинэн быһылынна. Муус эстэр кэмигэр сыана 3000 солк. диэри үрдүөҕэ. «Хивус» катер-амфибия сылдьыбат түгэнигэр, пассажирдары «Тайфун» аэроботтарынан таһыахтара. Сыаната 4000- тан 5000 солк. диэри үрдүөҕэ», — диэн Борис Строев кэпсээтэ.
10 саастарыгар диэри пассажирдарга 50%-наах чэпчэтии көрүллэр. Босхо айаннааһын биэс саастарыгар диэри оҕолорго уонна байыаннай дьайыы зонатыгар сулууспалаахтарга көрүллэр. Гуманитарнай көмөнү уонна «груз 200» босхо таһыахтара.
Дьокуускай — Аллараа Бэстээх маршруттарыгар 30 салгын олбохтоох суудуналара уонна биэс аэроботтар тахсыахтара. «Лена-транс» хампаанньа муус устар 16 күнүттэн, оттон «Ленаводсервис» муус устар 17 күнүттэн үлэлэрин саҕалыыллар. Үлэлиир кыраапыга — 07:00 — 19:00 ч. Оттон кэлин күн уһуурунан 20:00 чааска диэри сылдьыахтара. Капитаннар эрэ буолбакка, биэрэктэргэ оробуочайдар эмиэ үлэлиэхтэрэ. Кинилэр өрүс уҥуоргу кытылыгар пассажирдарга катерга олорорго уонна таһаҕаһы, ойуур матырыйаалларын тиэйэргэ көмөлөһүөхтэрэ.
«Пассажирдары таһыы туһунан отчуоттуохпут. Үчүгэй суолунан биир уһукка 25 мүнүүтэ кэриҥэ бириэмэ баранар. Тохтобул Дьокуускайга «Намыв» ыстаансыйаҕа буолуоҕа. Быйыл ыстаансыйа сиригэр хаар ыстыбыт, тоҕо диэтэххэ кумах суудуна салгын олбоҕун алдьатар», — диэн Борис Строев кэпсээтэ.
«Биһиги анал тиэхиньикэнэн уунан уонна мууһунан айанныыбыт. Суолбут тэҥэ суох, онон пассажирдарга айан кэмигэр гаджеттары, төлөпүөннэри үчүгэйдик уктарга уонна болҕомтолоох буоларга сүбэлиибин», — диэн Борис Строев эбэн эттэ.
Санатан эттэххэ, Өлүөнэ өрүһү туоруур кыһыҥҥы суоллар Дьокуускай – Аллараа Бэстээх уонна Кангаласс маршруттарынан муус устар 17 күнүгэр диэри үлэлиэхтэрэ. Билигин 4 туоннаҕа диэри ыйааһыннаах тырааныспар сырыыта көҥүллэнэр.
Нам улууһугар Кириэс-Кытыл сэлиэнньэтин олохтооҕун, балаҕан ыйын 1 күнүгэр сүппүт кырдьаҕас киһини 50-ча киһи көрдүүр.…
Ньурба улууһун дэлэгээссийэтэ Запорожье уобалаһыгар саха норуотун ытык бэлиэтин – алгыстаах сэргэни туруоран, ийэ дойдуну…
Хайа боруодата Өймөкөөн оройуонугар баар рудникка сиҥнибит. Быһылаан түмүгэр биир киһи эмсэҕэлээбит, диэн балаҕан ыйын 4…
Дьокуускайга Улуу Кыайыы 80 сылыгар анаммыт «Кыайыы сиренэ» аахсыйа ыытылынна. Сайсары күөл тупсарыллыбыт набережнайыгар 80…
Илиҥҥи экэнэмиичэскэй пуорумҥа «Экстра Синема» хампаанньа генеральнай дириэктэрэ Петр Чиряев Непал Инвестиционнай сэбиэтин сүрүн толорооччу…
Үөһээ Бүлүү улууһун Тамалакаан нэһилиэгин олохтоохторун өр сыллааҕы баҕа санаалара туолан, Олохтоох көҕүлээһиннэри өйүүр бырагыраама…