Киин куорат Арассыыйа үрдүнэн үрдүк хамнастаах куораттар ахсааныгар киирдэ

Үлэ ырыынагар үлэһит илии тиийбэтэ уонна импорты солбуйар оҥорон таһаарыы күүскэ сайдыыта кэнники сылларга хамнас түргэнник үрдүүрүгэр төрүөтүнэн буолла. 2024 сыл түмүгүнэн, тэрилтэлэр үлэһиттэрин ааҕыллыбытынан хамнастара Арассыыйа үрдүнэн ортотунан 99 тыһыынча солкуобайга тэҥнэстэ, бу урукку сыллааҕар 18,5% үрдүк көрдөрүү.

«РИА Новости» сакааһынан «РИА Рейтинг» эспиэрдэрэ балаһыанньаны сыаналыыр сыалтан Арассыыйа сүүс саамай бөдөҥ куораттарын орто хамнастарын уонна тустаах кэмҥэ туттуллар табаар уонна өҥө  сыанатын суоттаан аахтылар. Бу дааннайдарга олоҕуран, хамнас таһымынан Арассыыйа куораттарын сэттис рейтинэ оҥоһулунна.

Куораттар орто хамнас кээмэйинэн наарданнылар. Рейтиҥҥэ хотугу куораттар уонна киин куорат агломерациялара инники күөҥҥэ сылдьаллар – Новый Уренгой, Салехард уонна Южно-Сахалинск. Бу үс куораттан ураты, бастыҥ уон куорат ахсааныгарАнадырь, Москва, Сургут, Магадан, Дьокуускай, Красногорск уонна Химки киирдилэр.

Ол курдук, үрдүк хамнастаах куораттар кэккэлэригэр сүнньүнэн хотугу куораттар талылыннылар. Санкт-Петербург бу сыллааҕы рейтиҥҥэ 13-с миэстэни ылла.

Чинчийии көрдөрбүтүнэн, 100 тыһыынча солкуобайтан үөһэ орто хамнас уон биэс куоракка, ол иһигэр Дьокуускайга бэлиэтэнэр. Эбиитин, Дьокуускайга 2025 сыл бастакы аҥаарыгар орто хамнас 113,2 тыһыынча солкуобайга тэҥнэспит. Оттон бу кэм иһигэр үүнүүтэ 12,5% буолла. Бу көрдөрүүлэринэн киин куорат рейтиҥҥэ 8-с миэстэҕэ таҕыста.