Дьокуускай баһылыга Евгений Григорьев суруналыыстары кытары көрүстэ

Дьокуускай куорат күнүн көрсө мээр Евгений Григорьев суруналыыстары мунньан пресс-конференция ыытта. Тэрээһин быйыл күһүн үлэҕэ киирбит Дьокуускай куорат М.Е. Николаев аатынан 40 №-дээх оскуолатын коворкинг киинигэр ыытылынна.

Бастаан суруналыыстары Дьокуускай куорат М.Е. Николаев аатынан 40 №-дээх оскуолатын дириэктэрэ Галина Васильева көрүстэ. Кини хас биирдии этээһи кэритиннэрэ сылдьан, саҥа оскуола туһунан кэпсээтэ, инникитин бу үөрэх кыһата Бэрэсидьиэн оскуолаларын ситимигэр киириэҕин эттэ.

Ол кэннэ болдьоммут чааска куорат мээрэ суруналыыстары кытары көрүстэ, оскуола коворкинг саалата киин куорат кыһалҕатын уонна сайдыытын кэскилин туһунан аһаҕас кэпсэтии былаһааккатынан буолла.

«Суруналыыстары кытары маннык үгэс буолбут көрсүһүү, кэпсэтии – ханнык баҕарар салайааччы киһи эбээһинэһэ, тоҕо диэтэххэ, кини көрдөрөр-иһитиннэрэр сириэстибэлэр бэрэстэбиитэллэрин кытта кэскиллээх, көдьүүстээх кэпсэтиини ыытарга көмөлөһөр. Төһөнөн элбэхтик көрсүһэбит да, соччонон кыһалҕаны быһаарыы уонна күннээҕи былааны оҥоруу судургутуйар» — диэн мээр кэпсэтиини саҕалаата.

Пресс-конференцияҕа туруоруллубут сүрүн боппуруостартан биирдэстэринэн олох-дьаһах хаһаайыстыбатын үлэтэ-хамнаһа, уулуссалары ыраастааһын буолла. Мээр кыстыкка бэлэмнэнии кыраапыгынан бара турарын уонна тымныылары этэҥҥэ туоруурга эрэллээҕин эттэ.

Ону таһынан маршрутнай опстуобустар автопааркаларын саҥардыыга ураты болҕомто уурулунна. Григорьев эргэ тиэхиньикэни саҥа, экологическай өттүнэн ыраас уонна табыгастаах оптуобустарынан солбуйуу былааннанарын, куорат кытыытынааҕы оптуобустарга билиэт төлөбүрүгэр саҥа исхиэмэ оҥоһулла сылдьарын иһитиннэрдэ. Бу, мээр этэринэн, тырааныспар өҥөтүн хаачыстыбатын тупсарыаҕа уонна куорат кытыытыгар олорооччуларга табыгастаах айаны оҥоруоҕа.

Куорат кииниттэн автовокзалы көһөрүү боппуруоһа эмиэ таарылынна. Евгений Григорьев бу миэрэ тырааныспар инфраструктуратын тупсарыыга уонна пассажирдарга табыгастаах усулуобуйаны тэрийиигэ наадалааҕын эттэ.

Элбэх атын куораттар курдук, Дьокуускай эмиэ вандализм кыһалҕатын көрсөр. Ол ордук сылаас тохтобулларга тахсар. Евгений Григорьев бу көстүүнү утары охсуһуу былааннарын үллэһиннэ, онно 2026 сылга комплекснаай миэрэлэр киириэхтээхтэр диэтэ. Мэр куорат баайыгар-дуолугар эппиэтинэстээх сыһыаннаһыыны уонна уопсастыбаннай бэрээдэги харыстааһыҥҥа олохтоохтор актыыбынай кытталлара улахан суолталааҕын тоһоҕолоото. Билиҥҥитэ 80-н тахса сылаас тохтобул баар буоллаҕына, аны сыл бүтүөр диэри 100-кэ тириэрдэргэ, тупсарыы үлэтэ барыта олохтоохтор тустарыгар оҥоһулллара ыйылынна.

Саҥа оскуолалар уонна оҕо саадтара тутуутун боппуруостара эмиэ күннээҕи былааҥҥа бааллара ахтылынна. Куорат нэһилиэнньэтин үүнүүтүнэн сибээстээн, мээр үөрэх систиэмэтэ модернизацияны уонна кэҥэтиини ирдиирин бэлиэтээтэ. Манна куорат кыбаарталларын комплекснай тутууларын тиэмэтэ ырытылынна, бу сөптөөх инфраструктуралаах саҥа табыгастаах олорор территорияны тэрийэргэ кыаҕы биэриэхтэрэ. Суруналыыстар саҥа тутуллар 204, 205, 206 түөлбэлэр тустарынан эмиэ ыйыталастылар, онуоха Дьокуускай куорат маастар-былааныгар бу барыта киирэн турарын, бириэмэтигэр барыта оҥоһуллуоҕун эттэ.

Куорат экологиятын кыһалҕалара эмиэ таарылынна. Григорьев куораты көҕөрдүү уонна уулуссалар быыллыйыыларын, буорунан бурҕаҥныылларын утары охсуһуу боппуруостарын эмиэ кэпсээтэ. Куорат уулуссалара барылара аспаалланнахтарына быыл көтөрө, киртийии суох буолуоҕар эрэнэрин эттэ. Бу хайысхаҕа көҕөрдүүнү элбэтии уонна куорат экологическай балаһыанньатын тупсарыыга саҥа бырайыактар көҕүлэнниэхтээхтэрин олус үчүгэйдик быһааран кэпсээтэ.

Пресс-конференция былаас уонна суруналыыстар икки ардыларыгар саҥа тыыны биэрдэ, бу куорат сытыы кыһалҕаларын көдьүүстээхтик быһаарарга көмөлөһүө. Евгений Григорьев былаас уонна суруналыыстар  бииргэ үлэлээтэхтэринэ, Дьокуускай олоххо табыгастаах уонна аныгы куорат буолуон сөбүгэр эрэлин биллэрдэ.