Дьокуускай баһылыгын онус кылаас үөрэнээччитэ солбуйар

Дьокуускай куорат дьаһалтатыгар Солбуйааччы күнэ саҕаланна. Бу күн оскуола үөрэнээччилэрэ киин куорат дьаһалтатыгар үлэлээн холонон көрүөхтэрэ диэн мээрийэ пресс-сулууспа иһитиннэрэр.

Дьокуускай баһылыгын Евгений Григорьевы Саха-корейскай оскуола онус кылааһын үөрэнээччитэ Роман Хайдуров солбуйуоҕа. Киин куорат сайдыытын боппуруостарыгар мээри солбуйааччы Антон Алексеенконы 6-с №-дээх оскуола 11 кылааһын үөрэнээччитэ Эркин Исаков, куорат хаһаайыстыбатын боппуруостарыгар мээри солбуйааччы Владислав Слепцову 2-с №-дээх оскуола 8-с кылааһын үөрэнээччитэ Денис Константинов, суол боппуруостарыгар солбуйааччы Владимир Дорожкины Саха гимназия 11-с кылааһын үөрэнээччитэ Дьулустан Корнилов, социальнай боппуруостарга солбуйааччы Владимир Аржакову 31-с №-дээх оскуола онус кылааһын үөрэнээччитэ Павел Ножнинов, аппараат салайааччыта Руслан Тимофеевы классическай гимназия 10-с кылааһын үөрэнээччитэ Милена Архипова солбуйуохтара.

Үөрэнээччилэр дьаһалта куораты салайар үлэтин кытта сиһилии билсиэхтэрэ, ол иһигэр ЕСЭД систиэмэ үлэтин көрүөхтэрэ, хайысхаларынан настаабынньыктар сорудахтарын толоруохтара, мунньахтарга кыттыахтара.