Дьокуускай биир уулуссатыгар биэнсийэлээх дьахтары халаабыттар

ИДьМ «Дьокуускайдааҕы» 4 №-дээх полиция отделын холуобунай ирдэбил оперативниктара суһал-көрдүүр тэрээһиннэрин кэмигэр, Дьокуускай куорат Поярков уулуссатыгар биэнсийэлээххэ саба түһэн, халааһыҥҥа уорбаланар, урут уорууга сууттаммыт 55 саастаах эр киһини туттулар.

Материальнай хоромньу 100 тыһыынча солкуобай кэриҥэ буолла диэн СӨ ИДьМ пресс-сулууспата иһитиннэрэр. Силиэстийэҕэ быһаарыллыбытынан, буруйу оҥорооччу түүн Поярков уулуссанан иһэр биэнсийэлээх дьахтарга кэнниттэн саба түһэн, илиититтэн сыаналаах смартфоннаах суумкатын былдьаан ылбыт. Ол кэннэ эр киһи тиэргэннэринэн куоппут. Уорбаланааччы этэринэн, суумкатын тута бырахпыт, оттон былдьаабыт мобильнай төлөпүөнүн сотору кэминэн сүтэрэн кэбиспит. РФ Холуобунай кодексатын 161-с ыстатыйатын 1-кы чааһынан («Халааһын») холуобунай дьыала тэрилиннэ.