Дьокуускай быйыл «Сообщество» пуорум иккис былаһааккатынан буолуо
![](https://sakha-sire.ru/wp-content/uploads/2023/07/f6f3881124570c8c7e98ca5d60da2a4d1505c312-900x596.jpg)
Атырдьах ыйын 1 уонна 2 күннэригэр Дьокуускай куоракка РФ Уопсастыбаннай балаататын үгэс буолбут «Сообщество» пуорума ыытыллыа. Тэрээһин тиэмэтэ – «Сила России: потенциал территорий как ключ к развитию».
Бу туһунан Ил Дархан пресс-сулууспата иһитиннэрэр.
«Уһук Илин уокуругар «Сообщество» пуорумнарыгар үгэс быһыытынан эрэгийиэн сайдыытын боппуруостара дьүүллэһиллэллэр. Бу пуорум кэммиэрчэскэйэ суох секторы сайыннарар саамай чаҕылхай уонна ситиһиилээх социальнай бырайыактары билиһиннэрии былаһааккатынан буолар. Эрэгийиэн олохтоохторо пуорумҥа кыттыахтара итиэннэ федеральнай уонна эрэгийиэннээҕи былаас бэрэстэбиитэллэрин иннигэр бэйэлэрин кыһалҕаларын бэлиэтиэхтэрэ диэн эрэнэбит. Биһиги сорукпут – дьон этинэрин таһынан, эрэгийиэннээҕи уонна федеральнай былаастар дьон кыһалҕатын быһааралларын ситиһии буолар», — диэн РФ Уопсастыбаннай балаататын сэкирэтээрэ Лидия Михеева кэпсээтэ.
Пуорум чэрчитинэн үс улахан тиэмэнэн дьүүллэһии былаананар: «Суверенитет», «Үгэстэр» уонна «Кыахтар».
Бырагыраама быһыытынан секцияларынан дьүүллэһиилэр, бырайыак сессиялара, төгүрүк остуоллар, маастар-кылаастар, сэминээрдэр, питчинг-сиэссийэлэр, трениннэр уонна мунньахтар ыытыллыахтара.
Быйыл бастакы эрэгийиэннээҕи «Сообщество» пуорум Воронеж куоракка буолан ааспыта. Сыл бүтүөр диэри өссө Вологда уонна Самара куораттарга ыытыллара былааннанар.
Кыттааччылар бу сигэнэн регистрацияланыахтарын сөп: https://forms.yandex.ru/cloud/6450d3885d2a0602b5107a7b/.
«Сообщество» пуорум туһунан «ВКонтакте» маннык сигэнэн көрүөххүтүн сөп: https://vk.com/forum.oprf.
Сообщить об опечатке
Текст, который будет отправлен нашим редакторам: