Дьокуускай дьаһалтата байыаннай дьайыы кыттыылаахтарын дьиэ кэргэннэрин оҕуруот аһынан хааччыйар

Бэҕэһээҥиттэн Дьокуускай куоракка уонна куорат кытыытынааҕы сэлиэнньэлэргэ олорор байыаннай дьайыы кыттыылаахтарын дьиэ кэргэттэригэр оҕуруот аһын нобуорун тарҕатыы саҕаланна.

Оҕуруот аһын нобуорун бу ый бүтүөр диэри байыаннай дьайыы кыттыылаахтарын дьиэ кэргэттэрин дьиэлэригэр тиэрдиэхтэрэ.

Дьокуускай куорат баһылыга Евгений Григорьев «Горснаб» муниципальнай тэрилтэ ыскылаатыгар сылдьан, оҕуруот аһын нобуорун хайдах бэлэмнииллэрин көрдө-иһиттэ. Бу нобуорга 30 кг хортуоска, 5 кг луук, 3 кг моркуоп уонна 3 кг сүбүөкүлэ киирэр.

«Биһиги байыаннай дьайыы кыттыылаахтарын дьиэ кэргэттэригэр араас өрүттээх көмөбүтүн салҕыыбыт, ааспыт сыллааҕы курдук, быйыл эмиэ сибиэһэй оҕуруот аһын дьиэлэригэр илдьэн биэриэхпит. Оҕуруот аһа барыта, лууктан ураты, куорат сиригэр-уотугар үүннэриллибитэ. Байыаннай дьайыыга кытта сылдьар байыаннай сулууспалаахтарын дьиэ кэргэттэрин өйүүр Дьокуускай куорат уокуруктааҕы дьаһалтатын үлэтин биир сүрүн хайысхатынан буолар», — диэтэ Евгений Григорьев.

Байыаннай дьайыы кыттыылаахтарын дьиэ кэргэттэригэр барыта 80 туонна кэриҥэ оҕуруот аһа тиэрдиллиэ диэн иһитиннэрэр Дьокуускай куорат дьаһалтатын пресс-сулууспата.