Дьокуускай гостиницатыгар федеральнай ирдэбилгэ сылдьар киһини туттулар

Росгвардия Управлениетын пресс-сулууспата иһитиннэрбитинэн, сарсыарда эрдэ Дьокуускайдааҕы Росгаврдия кииннэммит охрана дьуһуурунай пультун суһал сигнализациятын кнопката үлэлээбит.

Бу суһал биллэрии Дьокуускай куорат харабылланар эбийиэгин — гостиницаттан кэлбит. Аҕыйах мүнүүтэнэн Росгвардия үлэһиттэрэ гостиницаҕа ойутан кэлбиттэр. Гостиница администратора иһитиннэрбитинэн, хоноһо бэрээдэги тутуспатах, айдаан тардан атын хоно сытааччылар ууларын уйгуурдубут.

Бэрэбиэркэ түмүгүнэн биллибитинэн, уорууга түбэһэн эрдэ сууттаммыт 34 саастаах федеральнай ирдэбилгэ сылдьар киһи буолан биэрбит. Кини массыына ыыта сылдьан суол быраабылатын кэһэн, киһи доруоуйатыгар улахан эмсэҕэлээһини оҥорбут эбит. Онон тутуллубут киһини полиция дьуһуурунай чааһыгар аҕалбыттар.