Дьокуускай инфраструктуратын сайыннарыы саҕаланна

Бэҕэһээ Дьокуускай куорат баһылыга Евгений Григорьев Уокуруктааҕы дьаһалта ааспыт 2023 с. үлэтин салайар хампаанньалар уонна олорор дьиэни бас билээччилэр табаарыстыбаларын салайааччыларын (ТСЖ) иннигэр отчуоттаата.

Бу туһунан Дьокуускай куорат дьаһалтатын пресс-сулууспата иһитиннэрэр.

Евгений Николаевич салайар хампаанньалар уонна олорор дьиэни бас билээччилэр табаарыстыбаларын бэрэстэбиитэллэригэр территориялары тупсарыыга, ону көрүү-харайыы хаачыстыбатын үрдэтиигэ уонна туһаныыга, ону сэргэ бу боппуруостары олохтоохтору кытта быһаарарга мунньахтары ыытыы туһунан боппуруостары дьүүллэһэргэ этии киллэрдэ.

Эрдэ биллэриллибитин курдук, 2024-2026 сс. Дьокуускай инфраструктуратын сайыннарыыга үс сыллаах былаан биллэриллибитэ. Үс сыл устата уопсастыбаннай тырааныспар тиһигин саҥардыы, сылаас тохтобулу тупсарыы, уулуссалары сырдатыы, гаастааһын тэтимин түргэтэтии, Табаҕа уонна Кангаласс сэлиэнньэлэригэр канализационнай-ыраастыыр ыстаансыйа тутуута, Марха микро-оройуонугар уунан хааччыйыы, элбэх оҕолоох ыалларга сир учаастактарын инфраструктуратын бэлэмнээһин оҥоһуллуоҕа.