Дьокуускай киинигэр дьону кырбаабыт ыччаты көрдүүллэр

Дьокуускай киинигэр Киров уулуссаҕа баар түүҥҥү аралдьытар тэрилтэ аттыгар түөрт киһи икки уолу кырбаабыттар. Бэрэбиэркэ ыытыллар ИДьМ пресс-сулууспата иһитиннэрэр.

«Билиҥҥи кэмҥэ ИДьМ 2 №-дээх полициятын отделын үлэһиттэринэн охсуһуу кыттааччыларын быһаарарга уонна тутарга, ону таһынан буолбут быһылаан бары быһаарыыларын чуолкайдыырга туһуламмыт бэрэбиэркэ ыытыллар», — диэн биэдэмистибэ иһитиннэриитигэр этиллэр.

Быһылаан видеота социальнай ситимнэргэ тарҕаммыт. Видеоҕа биллибэт дьон сиргэ сытар икки уолу кырбыыллара көстөр. Кинилэри илиилэринэн уонна атахтарынан төбөлөрүн охсо сатыыллар. Саба түспүт дьон күрээбиттэрин кэннэ, кырбаммыт уоллартан биирдэстэрэ туран хаалар, оттон атына өйүн сүтэрэн сытар.