Дьокуускай куоракка хас сахалыы кылаас баар?

Дьокуускай куораттааҕы үөрэх управлениетын начаалынньыга Мария Петрова саха тылын үөрэтиигэ икки барыйаан баарын эппит. Сахалыы кылаас төһө элбэх эбитий?

Дьокуускай куораттааҕы үөрэх управлениетын начаалынньыга Мария Петрова “Эхо столицы” хаһыат  нөҥүө киирбит оскуолаҕа, үөрэххэ сыһыаннаах ыйытыыларга хоруйдаабыт.

Ааҕааччылар: “Дьокуускай куоракка хас сахалыы тылынан үөрэнэр кылаас баарый? Төрөөбүт тылы үөрэтэр кылаас төһөнүй? Уопсайынан, итини тус-туспа араараллар дуо? Эбэтэр управление барыларын “сахалыы кылааһынан” ааҕар дуу? Дьиҥэр, үөрэтии уратыта олус улахан” – диэн ыйыппыттар.

— Дьокуускай куоракка саха тылыгар үөрэтии икки барыйаана баар. Бастакы барыйаанынан, саха тыла төрөөбүт тыл курдук – бу барыйаанынан 318 кылаас үөрэнэр. Иккис барыйаанынан, туспа биридимиэт быһыытынан үөрэтэллэр – 246 кылаас. Онтон эбии үөрэхтээһин быһыытынан оҕолор өссө 5 кылааска тылы факультативка эбэтэр куруһуокка үөрэтэллэр, — диэн начаалынньык хоруйдаабыт.