Дьокуускай куоракка полиция үлэһиттэрэ баан каартатыттан харчы уоруутугар уорбаланар киһини буллулар

ИДьМ 1-кы нүөмэрдээх полиция салаатын дьуһуурунай чааһыгар дьахтар тиийэн бааным каартатыттан 16 тыһ. солк. курдук сууманы уорбуттар диэн сайабылыанньа суруйбут. Бу иннинэ дьахтар каартатын сүтэрбит эбит, сотору кэминэн кини атыыласпатаҕын үрдүнэн ороскуот туһунан иһитиннэриилэр киирбиттэр.

Суһал-көрдүүр үлэ түмүгэр баай-дуол буруйдарын арыйар салаа үлэһиттэрэ Сунтаар улууһуттан төрүттээх 25 саастаах киһини булбуттар.

Уорбаланааччы дьахтар таһырдьа түһэрбит каартатын булбут уонна маҕаһыынтан атыылаһарыгар туһаммыта биллибит. Эмсэҕэлээччи каартатыгар хааччахтааһыны туруоруор диэри буруйу оҥорооччу 16 тыһ. солк. кэриҥэ суумаҕа атыыласпыт.  Дьахтар хааччахтааһыны туруорбутун билэн баран каартаны бырахпыт.

РФ Холуобунай кодексын 158 ыст. 3 ч. “Уоруу” холуобунай дьыала тэриллибит, тустаах ыстатыйанан 6 сылга диэри болдьоххо көҥүлэ быһыллыан сөп.

Ити туһунан ИДЬМ пресс-сулууспата иһитиннэрэр.