Дьокуускайга Саха сирин бастакы бэрэсидьиэнэ М.Е. Николаев мемориала тутуллуо

Бүгүн, балаҕан ыйын 27 күнүгэр, СӨ Судаарыстыбаннас күнүгэр аналлаах быһа эпиирин биир бастакы ыйытыытынан балаҕан ыйын 1 күнүгэр саҥа тутуллан үлэҕэ киирбит М.Е.Николаев аатынан Дьокуускай куорат 40-с №-дээх оскуолатын оҕолорун ыйытыыта буолла.

Саха сирин бастакы Бэрэсидьиэнэ Михаил Ефимович Николаев пааматынньыга Дьокуускайга тутулларын туһунан ыйыттылар.

Михаил Николаев төрөөбүт дойдутугар, Хаҥалас улууһун Өктөмүгэр, киниэхэ аналлаах мемориал комплекса оҥоһулла сылдьар. Оттон Дьокуускай куоракка Ил Дархан М.Е. Николаев проспегын уонна Сэргэлээхтиир суоллар быһа охсуһууларыгар, ипподром таһыгар – тутулла турар Арктическай киин иннигэр туруоруллуоҕа диэн эттэ.

Саха норуотун киэн туттар бастакы бэрэсидьиэнигэр аналлаах пааматынньык бырайыагын анал хамыыһыйа талыаҕа. Сэтинньи 13 күнүгэр мемориалы уонна чугастааҕы уопсастыбаннай сири бырайыактыахтаах куонкурус кыайыылааҕа быһаарыллыаҕа.

Бу туһунан Саха сирин Ил Дархана Айсен Николаев «Быһаччы лииниьийэҕэ» кэмигэр иһитиннэрдэ.