Дьокуускай куоракка сылааһы биэрии бу нэдиэлэнэн тохтуо

Дьокуускай куоракка бу нэдиэлэҕэ сылааһы биэриини тохтотуохтара. Оттон сааскы халаантан эмсэҕэлээбит орйуоннарга муниципальнай тэрээһиннэр сайаапкаларынан уһатыллыа.

Ол туһунан олох-дьаһах, коммунальнай хаһаайыстыба уонна энэргиэтикэ миниистирэ Вячеслав Емельянов иһитиннэрдэ.

«Өлүөхүмэҕэ, Ленскэйгэ, Горнайга, Хаҥаласка, Мэҥэ Хаҥаласка, Чурапчыга, Аммаҕа, Тааттаҕа, Намҥа, Уус Майаҕа, Кэбээйигэ уонна хоту улуустарга ититии сезона ыам ыйын бүтүөр диэри бэриллиэ», — диэн миниистир эттэ.

Дьокуускайга элбэх кыбартыыралаах таас дьиэлэр батареяларын ыам ыйын 25 күнүгэр, мас дьиэлэрин уонна социальнай эбийиэктэрин бэс ыйын 7 күнүгэр араарыахтара.