Дьокуускай куоракка уонна уокуруктарынан «Өйдүүбүт! Киэн туттабыт! Махтанабыт!» сүүрүү ыытыллар

Сүүрүү көмүскээччилэргэ аналлаах «Өйдүүбүт! Киэн туттабыт! Махтанабыт!» сүүрүү аахсыйата хас да түһүмэҕинэн ыытыллар.

Ыам ыйын 2 күнүгэр буолбут сүүрүү бастакы түһүмэҕэ Кангаласс уонна Тулагы-Киллэм түөлбэлэргэ ыытылынна. Икки сүүстэн тахса кыттааччы ортотугар Дьокуускайтан уопуттаах чэпчэки атлетика спортсменнара, куорат таһынааҕы сэлиэнньэлэр олохтоохторо сүүрүүгэ көхтөөхтүк кытыннылар.

Бүтүн Арассыыйатааҕы «Мы – наследники Великой Отечественной войны» аахсыйа чэрчитинэн Кыайыы Былааҕын туттарыы сиэрэ-туома буолла. Дьокуускай куорат 1 №- дээх орто уопсай үөрэхтээһинин оскуолатын уонна «Юнармия» дьиэтин оҕолоро бэлиэни куорат таһынааҕы салайааччыларыгар үөрүүлээх быһыыга-майгыга туттардылар, диэн куорат мэриятын пресс-сулууспата суруйар.

Дистанцияҕа сүүрбүт хас биирдии кыттааччы өйдөбүнньүк мэтээллэри уонна футболкалары туттулар.

Ыам ыйын 3 күнүгэр сүүрүү Марха уонна Маҕан сэлиэнньэлэригэр буолан ааста. Мархаҕа сүүрүүгэ 100-чэ кыттааччы, оттон Маҕаҥҥа 60-тан тахса киһи кытынна.

Ыам ыйын 4 күнүгэр эстэпиэтэ Табаҕа, Хатас уонна куорат таһынааҕы бөһүөлэктэргэ салҕанан, ыам ыйын 8 күнүгэр Дьокуускайга Доҕордоһуу болуоссатыгар ыытыллыаҕа. Манна араас саастаах уонна идэтийбит дьон кыттыыны ылаллара күүтүллэр.

Күрэх тэрийээччилэрэ кыттар баҕалаахтары барыларын ыҥыраллар. Регистрация забег.победы.рф. саайтка ыытыллар.